uMthunywa
Thokozile Mbedzi
KULENDODA yakoBulawayo egwaze umngane wayo kahlanu ngengqamu ekhanda kuviki ephelileyo ngoba embone ebala imali kodwa ethe kalamali ngesikhathi kuthengwa ukudla.
Umetheswacala uGift Choga oleminyaka engu-29 wafica umngane wakhe uWitness Matutu oleminyaka engu-23 ebala imali kodwa yena ethe kalamali yokuthenga ukudla.
Kubikwa uChoga kazange aphozise amaseko kodwa wahle wavele wadobha isitina wamtshaya kanye ngaso ekhanda, wathatha usungulo wamgwaza kabili ekhanda andubana akhiphe futhi ingqamu ebhulugweni wamgwaza kahlanu ekhanda.
Ekhuluma lentatheli kaMthunywa uMnumzana Louis Mpofu uthe babone into yamehlo.
“Kwenzakale okunye lapha, abadala baqinisile sibili nxa besithi okukhulu akulamkhosi ngoba uWitness loGift ngabangane.
Ababili laba babe lokungazwisisani ngemva kokuba uGift ethole uWitness ebala imali engaba yi-US$30, lokhu akuzange kumphathe kuhle ngoba wayethe kalamali ngesikhathi kuthengwa ukudla.
“Lokhu yikho okwenza wahle wamthathela imali yakhe ngenkani.
UWitness uthe lapho esezama ukuthi amlandele ngemuva athathe imali yakhe uGift wahle wavuka ubhova wadobha isitina wamtshaya ekhanda, wamgwaza kabili ngosungulo waphinda wakhipha ingqamu wamgwaza ngayo kahlanu ekhanda,” kutsho uMnu Mpofu.
Kubikwa uMatutu wahle wathwalelwa esibhedlela lapho alokhu elaliswe khona.
Isikhulumi samapholisa koBulawayo uInspector Abednico Ncube ebuzwa ngodaba lolu uvumile wathi solufikile ehofisini yabo.
“Udaba lwamadoda alwe alimazana solufikile ehofisini yethu. Kungakho amapholisa enelise ukubopha olimaze omunye.
“Uzulu uyaxwayiswa njalo ukuthi nxa esuke waba lengxabano kaxazulule inkinga ngendlela eqondileyo badinge ukwelulekwa ukuze kungabi lengozi ezifana lalezi,” kuphetha uInsp Ncube.
