uMthunywa
Ethel Ncube
KULENDODA yesigabeni sakoSikhobokhobo eNkayi eyethuse izakhamizi kulandela ukugwaza uyise wentombazana eleminyaka engu-14 athandana layo emhlane ngomkhonto wathutsha esiswini izondele ukuthi ufuna ukuyibophisa.
Isehlakalo lesi senzakale ngeviki ephelileyo ngoLwesibili lapho umetheswacala uPhathisani Dube agwaze uyise womfundi (igama siligodlile ngenhloso yokuvikela umntwana) athandana laye ngomkhonto ngoba esesaba ukuba usesiyambophisa ukuba uthandana lomntanakhe oleminyaka engu-14 yokuzalwa.
UMthunywa uxhumane lenduna uSikhobokhobo oveze ukuba indaba enjalo yafika kuye njalo waze wathwalela ubaba lowo esibhedlela seMbuma Mission.
“Indaba le yafika kimi ngayidlulisela emapholiseni. Ubaba lo wabuya ezocela ukuncediswa ethi uPhathisani Dube uhlukuluza indodakazi yakhe emacansini. Ngambhalela incwadi ngathi kaye emapholiseni ngoba umntanakhe eleminyaka engu-14.
“Ngemva kwesikhathi ngafonelwa sekuthiwa usegwazwe ngomkhonto nguPhathisani Dube. Umkhonto wasala ulokhu unamathele umgwaze emuva wayathutsha esiswini ngamthwala ngaya laye esibhedlela ukuba ayekwelatshwa.
“Okwakhathesi umkhonto usukhitshiwe kodwa lokhu esebuhlungwini njalo usalalisiwe esibhedlela seMbuma,” kutsho induna uSikhobokhobo.
Intatheli ibuye yakhulumisana lesikhulumi samapholisa eMatabeleland North uInspector Glory Banda oveze ukuba udaba olunjalo balwemukela.
“Indaba le isezandleni zamapholisa ikanti umamangala ulalasiwe esibhedlela seMbuma Mission Hospital.
“Umetheswacala uPhathisani Dube kakabotshwa, uyadingwa ngamapholisa kungakho sicela ongabe elolwazi lokuthi ungaphi abikele amapholisa aseduzane laye,” kuphetha uInsp Banda.
