Uncategorized

Ugwaza umngane kubangwa ukuthenga utshwala

12 Sep, 2019 - 00:09 0 Views
Ugwaza umngane kubangwa ukuthenga utshwala

uMthunywa

Thokozile Mbedzi

NGENXA yokuthanda uMagwebu kulendoda yesiqintini seCingo eMadlambuzi egwaze enye esifubeni ngengqamu kubangwa ukuthi kungani ehluleke ukuthenga utshwala yena enathe obebuthengwe ngabanye.

UBambanani Tshuma oleminyaka engu-30 ugwaze uIsrael Ndlovu oleminyaka engu-28 nge-okapi esifubeni ngempelaviki edluleyo ngoba enathe utshwala bakhe wehluleka ukuthenga obunye.

Ekhuluma lentatheli uMnumzana Busani Moyo oyisakhamuzi kule indawo uveze ukuthi ababili laba babenatha kwasekuqhamuka impi sekubangwa ukuthi uIsrael athenge utshwala ngoba ubephethe ekhelelela utshwala uBambanani ethenga.

“Ngilokhu ngilesithuli ngesenzo sikaBambanani sokugwaza omunye wakhe ngoba ubebhija utshwala kodwa engathengi, ngikhuluma nje ulokhu esesibhedlela njalo usesimeni esibi.

“Umsindo waqhamuka utshwala sobuphelile sokuthiwa uIsrael athenge kodwa wathi kalamali kwahle kwaba yisiwowowo. Okungizwisa ubuhlungu yikuthi wamhlaba endaweni eyesabekayo esifubeni njalo kukhanya le-okapi leyo wayitshonisa,” kulandisa uMnu Moyo.

Esinye isakhamuzi sakulindawo uMnumzana Vusumuzi Khabo uthe kuyisimanga indlela amadoda la aziphathe ngayo ngoba bangabangane njalo bahlala bencedisana kunhlupho nje zonke ababhekana lazo.

“Mina ngilesimanga ngendlela amajaha la ayenze ngayo ngoba bangabangane, bahlala bencedisana kuwo wonke amahlandla empilo, asazi ukuthi moya bani osuke wangena kuBambanani owobuhwaba botshwala oze wadala ukuba agwaze omunye wakhe. Asazi kumbe uzaphila kumbe hatshi,” kutsho uMnu Khabo.

Omele isikhulumi samapholisa esabelweni seMatabeleland South uSergeant Starnford Mguni ebuzwa ngodaba lolu uvumile wathi solufikile ewofisini yabo.

“Udaba lwendoda ehlabe enye nge-okapi kubangwa ukuthenga utshwala solufikile ewofisini yethu. Njengamapholisa sithanda ukuxwayisa uzulu ukuba angabohamba ethwele izikhali ngoba yizo ezidala ukuba abantu balimazane ngoba basuka bathukuthele kakhulu bacine belimazana loba ukubulalana. Umetheswacala usezandleni zamapholisa,” kuphetha uSgt Mguni.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds