uMthunywa
Thokozile Mbedzi
ZILOKHU zisakhakhamele izakhamizi zeMtshabezi ngemva kokuba enye indoda igwaze omunye ngomkhonto kubangwa umfazi qede yazibophela.
Kubikwa uNdanisa Moyo walanda uBen Khatha Moyo ethwele umkhonto wathi kafuni kudelelwa andubana athi uzamfundisa isifundo yena kunye labangakibo ukuthi unkosikazi womuntu kathathwa.
UMthunywa uzwe ukuthi uNdanisa ngemva kokukhuluma lamazwi wagwaza uBen ngomkhonto kodwa wathi embona esethe daca phansi wabaleka wayazibophela. Ekhuluma lentatheli omunye umfakazi oxoxisane loMthunywa uKhathazile Mhlanga uthe lokhu betshe amathe ngabakubonayo.
“Kasilamazwi ngenkemenkeme le esehleleyo njengezakhamizi labomakhelwane, silapha ngoba thina esintwini kuyazila ukubulala umuntu ngomkhonto.
“Ukuchitheka kwegazi egumeni kuyingozi njalo kuletha uzimu. UNdanisa ngokubona kwami ubezenza olamandla yikho okumkhokhelele ebubini lobu njalo ezinye intanga zakhe bezimesaba, yikho okwamenza wathatha umthetho wawufaka ezandleni zakhe. Ubevele esehluphile ngokuhlala etshaya abanye ontanga bakhe esigabeni,” kulandisa uMnu Mhlanga.
UMnu Mhlanga uqhubekele phambili wathi uNdanisa esegwaze lundoda waqaleka yena wabona angathi usebulele umuntu kungakho wahle wayazibophela.
“Kukhanya uNdanisa wathi ebona umuntu esethe daca phansi wethuka wayazihilela. Kukanti lo ayemgwazile waphaphama ngemva kwesikhatshana wasethwalelwa esibhedlela,” kutsho uMnu Mhlanga.
Isikhulumi samapholisa esabelweni seMatabeleland South uInspector Philisani Ndebele ebuzwa ngaloludaba uthe udaba lolu alukafiki ehofisini yabo njalo bazadingisisa ngalo.
