Ugwalo – Ugqozi Lwezimbongi – Isihloko senkondlo – Umuzi wakoBulawayo

07 May, 2020 - 18:05 0 Views
Ugwalo – Ugqozi Lwezimbongi – Isihloko senkondlo – Umuzi wakoBulawayo City of Bulawayo

uMthunywa

Ziqoqwe zahlelwa nguP Mpofu

Ugwalo ludindwe yiMambo Press ibambene leThe Literature Bureau

Imbongi nguC H Mkhwananzi

Okwensuku ezithile ezilandelayo sizahlela izinkondlo zembongi yethu le esiyiqambileyo ngoba zonke ziyaqamba iNkosi yesizwe sikaMthwakazi uLobengula wamawaba yena ezalwa nguMzilikazi kaMatshobana. Kulezinto ezithile esizazizwa mayelana loMzilikazi kanye lo Lobengula kulezi nkondlo ezithi: Umuzi wakoBulawayo, Entabeni zeMatojeni lale ethi, Umlamlankunzi. Lamhlanje kesizwe le esiyibethe ngaphezulu yona ekhuluma ngedolobho lakoBulawayo.

Imbongi kayitshongo ukuthi idolobho lakoBulawayo kodwa ilibiza ngokuthi ngumuzi wakoBulawayo. Mkhulu lo umuzi ngoba imbongi ithi nxa iqhamuka, ithutsha isesekude ihlangabezwa yimphotshongo lendunduma lezindlu yona isesekhatshana. Omunye usengabuza ukuthi yiphi leyo mphotshongo ebonwa yimbongi isesekude? Njengoba siwazi umuzi wakoBulawayo, imphotshongo le yileya ehla ithunqa intuthu kuphekwa amagetsi. NgesiLungu kuthiwa yi”Power Station”.

Ngeminyaka ethile eyedlulayo ezomkhonomi zisami kuhle elizweni lakithi yayihla ithunqa intuthu kuleyo mphotshongo etshiwo yimbongi njalo yayibonakala umuntu esesekude engakafiki emuzini wakoBulawayo. Lokhu kwaze kwenza abantu bawupha ibizo elithi koNthuthuziyathunqa ngoba kwakuhlezi kuthunqa intuthu egaywa amagetsi. Njengamadolobho wonke womhlaba emadolobheni kwakhiwa izindlu ezinkulu eziyaphezulu ezikuhlala kanti ezinye ngamafekithali ngalokho yizo lazo izindlu lezi ezibonwa yimbongi isesekhatshana lomuzi wakoBulawayo.

Nxa ibona ozomanga lezi iyabuza imbongi ukuthi ngubani njalo ungaphi umuntu okumele abongwe ngokwenza umsebenzi omuhle kangaka? Nxa ithi iyakhangela imbongi ibona izibane yibunkanyankanya ziyabukeka. Impendulo asipha yona yikuthi yiwo umuzi wakoBulawayo kodwa umbuzo alayo ngothi: “uph’umdabuli wayo?” Nxa ikhangelisisa njalo imbongi ibona iziphithiphithi. Abantu bayaphithizela okobunyonyo nxa izulu lisiza, bayale lale.

Ibuka konke lokhu imbongi kungathi akwaziwa lapho okuyiwa khona lokuthi kuyofunwani. Iyabuza njalo imbongi ukuthi ngesikabani lesisizukulwane? Iyabuza njalo imbongi ukuthi ngezani lezizindlu ezikhotha umkhathi? Kodwa iqiniso elikhona yikuthi komke lokhu yinotho yakoBulawayo. Umbuzo ulokhu ukhona engqondweni yembongi ukuthi ungaphi, ngubani umdabuli walumuzikazi? “Uph’nguban’ umdabuli wal’umuzikazi?”

Iyasitshela imbongi ukuthi akwazi muntu lapho atshona khona umdabuli walumuzikazi. Kayisitshiyi silombuzo ukuthi ngubani owadabula lumuzikazi. Iyacaca imbongi ukuthi akwazi muntu lapho atshona uLobengula wamawaba. Sekungathi ukhuluma laye uLobhengula embuza ukuthi ungaphi abone isigodlo sakhe lokutho lkhu umile lalamhlanje umuzi wakhe.

Hlala uhlanzekile ugeze izandla ngomlola (isepa). Vikela ICOVID 19 ngasosonke isikhathi!

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds