uMthunywa
Thokozile Mbedzi
BEKUNGABIZWA ozwayo kumkhosi wokwethulwa kogwalo olumumethe inkondlo olulotshwe ngumlobi osakhulayo ovutha amalangabi olulesihloko esithi Ubuntu (The raw truth unraveled).
UMthulisi Ndlovu wethule ugwalo lwakhe lwesine ngeviki ephelileyo eCillas Conference Centre koBulawayo ngenhloso yokufundisa uzulu ngobuntu.
Ugwalo lukaNdlovu olutsha lolu lumumethe inkondlo eyodwa ebhalwe isuka kukhasi lokuqala ize iyekuthi ngqe ekucineni kogwalo ichaza kabanzi ngobuntu besizwekazi seAfrika okuveza ukuzimisela kanye lokuzinikela.
UNdlovu uthe inkondlo le ilotshwe ngobunono obukhulu njalo ihlose ukuveza kabanzi ngemvelaphi yabansundu iphawulwa ngabansundu uqobo.
“Kugwalo lolu ngixwayisa uzulu ikakhulu ngokuthuthukisa izizwekazi zethu njengabantu. Ubuntu yibo obungigqugquzela ukuthi ngilobe izingwalo njalo njengamaAfrikakazi kuqakathekile ukuba imvelaphi yethu sibeyazi futhi iphawulwe yithi uqobo.
“Ugwalo lolu nxa lungasetshenziswa ngendlela ngibona luthinta impilo zabantu njalo lugqugquzela ukubambana kuzizwekazi zomhlaba wonke jikelele.
“Lokhu ngikutsho ngoba ngibona abantu belwamukela ngezandla zombili ezifudumalayo njalo okumunyethweyo kumemetheka okomlilo wenkotha. Abantu babuye ngobunengi babo njalo angilamathe ngilapha ngosekelo engiluthole kuzulu wonke jikelele lamazwe atshiyeneyo abalisela iSouth Africa, Zambia, Canada kunye leUnited Kingdom.
“Ngiswele imilomo ezinkulungwane yokubonga bonke abasekele ukwethulwa kogwalo lwami lolu oluthi Ubuntu (The raw truth unravelled),” kutsho uNdlovu.
UMhlonitshwa kumkhosi lo, uNjabulo Moyo uveze ukuthi ulokujabula okukhulu ngomsebenzi kaNdlovu obe lesibindi sokunqoba ubunzima ahlangana labo ngokuzithuthukisa elizweni kunye langaphandle kwelizwe.
“Ngilokuthokoza okukhulu ngomsebenzi kaMthulisi ngoba ubelesibindi sokuba anqobe ubunzima ahlangana labo ngokuzithuthukisa elizweni kunye langaphandle.
“Umbuthano lo ungijabulisile ngoba uzulu uthathele phezulu ugwalo lolu baluthenga ngentengo ephezulu, lokhu kuveza ukuba okumunyethweyo kuthinte wonke umuntu.
“Ugwalo lolu lusipha ukuthokoza njengamaAfrika ukuba sibale umsebenzi wethu olotshwe yithi amaAfrika njalo lokhu kwenza sikuzwisise ngcono ngoba abalobi laba baloba ngabakuphilayo futhi abakubonayo.
“Ngithanda ukwethula umsebenzi oyisimanga, inkondlo elotshwa isuka kukhasi lakuqala ize iyefika kukhasi lokucina. Lokhu kuveza umsebenzi oqotho,” kuphetha uMoyo.
