uMthunywa
YiNtatheli kaMthunywa
OWAKE waba ngumqeqetshi weqembu lesizwe, owalihola laze lahlala kunombolo yesine kuAfrican Championship of Nations (Chan) ngo2014, uIan Gorowa, usengumfundisi.
UGorowa (48) useqedile izifundo zakhe zoBahyibhili ekolitshini yeApostolic Faith Mission (AFM) Bible College eJoburg.
UGorowa usethethe inyathelo lokwekela ezemidlalo ukuze anikele impilo yakhe kuNkulunkulu.
“Ubizo lubizo, kumele ululalele,” kutsho uGorowa kuphephandaba leSunday Mail.
“Inguqu yisipho esivela kuNkulunkulu njalo ngiyayibonga iNkosi ngakho. Ukutshumayela ilizwi leNkosi yinto engiyithandayo. Impilo luhambo, kodwa loba kuluhambo, kumele ubone ukuthi uyenza umzamo wokuthi uhambe loluhambo endleleni eyiyo; ngokuhamba loJesu.
“Kungakho ngingathi ngakhetha indlela kaJesu. Ngoba ilizwi lithi (Johane 14: 6) ‘ngiyindlela, yeqiniso njalo lempilo. Kuluhambo olumangalisayo, khumbula njalo ukuthi uNkulunkulu usebenzisa lokho ovele ulakho. UMose wabuzwa nguNkulunkulu, ‘uphetheni esandleni sakho?’ wathi, ‘ngilenduku’, uNkulunkulu wasesithi, ‘ngizasebenzisa yona ukuze ngitshengise uPharaoh ukuthi ngikuthumile.”
UGorowa wadlala kumaqembu abalisa iBlack Rhinos kanye leDynamos kuPSL andubana ayedlala eSweden kuqembu le IFK Vasteras wasesiya kuqembu elingasekho eleCape Town Spurs.
Ngemva kokugaxa izicathulo zemidlalo ngemva kokulimala idolo, waqeqetsha iqembu leAjax Cape Town andubana ayekuba ngumkhokheli wabaqeqetshi beSwallows, Sundowns kanye leThanda Royal Zulu.
Ngesikhathi ekhetha ukuba ngumfundisi iqembu leNgezi Platinum beselimbize ukuthi azoliqeqetsha.
Kusenjalo omunye njalo umdlali uTauya Murewa laye ulandela ubizo olufanayo ngemva kokusabela ubizo kubandla lesion Christian Church (ZCC).
UMurewa ongudokotela owaze wanikezwa ibizo lokuthi nguFlying Doctor (udokotela ondizayo) ngesikhathi edlalela iAjax le Umtata Bush Bucks, akwaziwa okunengi ngaye lokhu watshiya umdlalo wenguqu.
