uMthunywa
Thokozile Mbedzi
KULENDODA yesigabeni seSibona eGwanda egalule emfuleni ngoba isithi iliqhawe kunkosikazi wayo njalo ngeke yalindela ukuthi umfula wentshe.
UPolite Mpofu obeleminyaka engu-34 ugalule ngesikhathi bevela ezitolo lonkosikazi bafica umfula usugcwele kodwa yena wathi ngeke awulinda uze wentshe kungakho wasechapha.
Kubikwa uMpofu waqhubeka wangena emfuleni umkakhe wasala ngoba esesaba ukuchapha.
Ekhuluma lentatheli uMnumzana Sindani Ndlovu ongomunye walabo abadinga uMpofu esethethwe ngamanzi uthe umuyi ubehlala ezenza iqhawe. “Sidabukile silapha ngomunye wethu ongubaba obhejele ukutshiya imuli ezincoma ngokuba liqhawe engena umfula ugcwele.
“Ababili laba bafika emfuleni baphikisana uPolite wathi yena uliqhawe ngeke wathathwa ngumfula olamanzi amalutshwana kanti uyaziyenga ngoba umfula wawugcwele. Kukhanya unkosikazi wakhe wala ukuba angene laye emfuleni njalo lokhu kwanceda ngoba babezathathwa bonke ngamanzi.
“Kukhanya wathi esanda kungena emanzini wahamba isibanganyana wahle wathathwa ngamanzi,” kutsho uMnu Ndlovu.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uvumile wathi solufikile ehofisini labo. “Njengoba izulu liqhubekela phambili lisina sithanda ukuxwayisa uzulu ukuthi angangeni emfuleni nxa igcwele njalo bananzelele abantwana labo bangadlaleli duzane lemifula.”
