uMthunywa
Mbulelo Mpofu
BEKUNGASOMVU’LOBOMVU mhla uzulu ethakazelela ilanga lokuphumula kwezisebenzi. Mhlalokho, bekungabizwa ozwayo enkundleni yeBulawayo Amphitheatre lapho umhlabeleli womculo weMbaqanga uGagisa ubejabulisa uzulu.
Lumlisa owazalelwa eBinga seyintandokazi yakoBulawayo okwabonakala ngendlela athakazelelwa ngayo ngabalandeli bakhe abaze baqansa bayagida laye esitikini kwaba yikudla kwamehlo.
Owayengazi ukuthi kwenzakalani wayengafunga ukuthi kulomthimba womtshado lapho ngendlela okwakuqhunswa ngayo ingoma zothando.
Gagisa
Lumbukiso obuhlanganiswe ngabeDab Three Events ubungowokuqala okaGagisa ngemva kwalowo awenza eZimbabwe International Exhibition Centre nyakenye.
Owathi intsha labokhekhe balalela umculo wamaPiano leHip-Hop kuphela wayengabuzanga elangeni.
Umcimbi kaGagisa wabonisa ukuthi kwelakithi abantu bayawuthanda umculo weMbaqanga ngoba kwakuhlangene intsha, abadala labokhekhe.
Umhlabeleli wezothando u-Adoe, lembongi ezinjengoThaluso Da Poet loSonkomose, iqembu lembube iGreat Stars Ijongosi le Khaisa Entertainment baxhasa uGagisa ngenkondlo langokusina okwajabulisa ababebukele.
Abazi amaqembu eNingizimu Africa abalisela amaSoul Brothers, Imitshotshovu kunye leMahlathini and the Mahotela Queens bakhumbula mandulo amaqembu lawa esasezingeni eliphezulu ngesikhathi umhlabeleli wengoma ethi, Ekhaya esestikini.
Soul Brothers
Abaqondisi bomdlalo lo kwakunguSipho Mercent Nyathi kanye loMelissa “Melcy T” Ntulini abeDab Three Events ababiza umhlabeleli wakoBulawayo olodumo uRamsey Kasawaya ukuthi azobingelela uzulu.
Kwaba lithuba elihle leli lokuthi lumhlabeleli ahole iqula labalandeli bakaGagisa ekuhlabeleni ingoma kaRingo Madlingozi ayihlabela lomuyi uOliver “Tuku” Mtukudzi eithi, Into Yami.
UGagisa wahlabela ingoma ezivela kudlalade lakuqala elithiwa Ekhaya. Lezingoma zibalisela ethi Usukhulile, Ekhaya kanye lethi Asamb’ekhaya.
