uMthunywa
Thokozile Mbedzi
KULENDODA yeMpoengs ePlumtree ebulele enye kuviki ephelileyo kubangwa iR200 yokubheja amakhasi.
Umetheswacala uElesias Siziba oleminyaka engu-35 yokuzalwa oweTshongogwe, eLupane kubikwa ubulele enye indoda kubangwa iR200 ayeyiboleke esiyabheja amakhasi.
Ekhuluma lentatheli kaMthunywa uMnumzana Betwell Zulu uthe lokhe belesithuli ngenkemenkeme yendaba eyenzakale endaweni yamabhizimusi.
“Silesithuli silapha, sibone inkemenkeme yendaba kambe umuntu efela iR200 yakhe ayeyiboleke uSiziba ebheja amakhasi. USiziba uthe esebuzwa imali esewinile, kazange athande ukuphendula kodwa uhle wafaka isandla esikhwameni wakhipha ingqamu wagwaza lo omunye esifubeni wahle wawela phansi,” kutsho uMnu Zulu.
Ebona ukuthi lo omunye sewele phansi yena uhle wacela ezinyaweni.
Isikhulumi samapholisa esabelweni seMatabeleland South uAssistant Inspector Thandolwenkosi Moyo ebuzwa ngodaba lolu uvumile wathi solufikile ehofisini yabo.
“Sichwayisisa udaba lwendoda egwaze enye yabaleka kubangwa imali yamakhasi.
“Uzulu ongabe elolwazi lwalapho uSiziba akhona sicela azise amapholisa aseduzane laye,” kuphetha uAsst lnsp Moyo.
