uMthunywa
Thokozile Mbedzi
ABABALISI labafundi beKwalu Secondary School eBeitbridge basele bedabuke izinhliziyo kulandlela ukubhubha komunye umfundi owedlule emhlabeni kulandela ukugijima kuma sports esikolo ngeviki ephelileyo.
Kubikwa uAshley Ndou obesenza izifundo zika -Form 2 kulesisikolo uqaleke wedlula emhlabeni begijima i-400 metres labanye bakhe.
Ekhuluma lentatheli kaMthunywa uNkosazana Tivilayeli Moyo uthe behlelwe liyezi elimnyaka kusedlula lumntwana.
“Sehlelwe liyezi elimnyama esikolo sethu lakhathesi abantu bathithibele ngalesi sehlakalo esibuhlungu.
“UAshley ubezigijimela labanye kuma sports njengensukwini kubikwa uqalekile wasethwalelwa esibhedlela.
“Esibhedlela abongikazi bafike benza konke okusemandleni abo kodwa kwehlula.
“Lokhu kusiqede amandla njengabazali ngoba abantwabethu bethukile njalo abanye sebesesaba ukugijima esikolo.
“Thina njengabazali sicela ukuba abezemfundo basiphathise beluleke abafundi laba kunye lababalisi ngoba isiga abahlangane laso sibuhlungu njalo kunzima ukuba bakukhohlwe lokhu.
“Labazali silesicelo sokuba baphathiswe ngokuba bakwamukele lokhu ngoba akusiyo into elula ukukwamukela labo babe khangelele ukuba umtwana uzafunda laye abelekusasa lakhe elihle.
“Thina njengezakhamizi zalapha lathi sizama ngazo zonke indlela ukuba sikhale ndawonye lemuli le,” kulandisa uNkzn Moyo.
Isikhulumi sezemfundo eMatabeleland South uNkosazana Beatrice Manjere ebuzwa ngodaba lolu uthe kulobunzima.
“Lokhu okwenzakeleyo kubuhlungu kakhulu, sikhala sindawonye lezihlobo zomntwana kanye lesikolo.
“Umntwana lo akusikho ukuthi ubelesifo esaziwayo ebesingabangela ukuthi aphatheke kubi angadlala ama sports, usitshiyile singalindile,” kutsho uNkszn Manjere.
