uMthunywa
Ethel Ncube
KWEHLE iyezi elimnyama kwenye imuli eMaboleni eLower Gweru ngemva kokuba ubaba lomama behluleke ukuzwisisana ngodaba lwenkomo obekumele ithengiswe.
Indaba le yenzakale ngolweSihlanu lapho abantwana abatholakale belele phansi bancedwa yisihambi ebesizidlulela ukuba bathwalele esibhedlela ngemva kokudla itshefu engaziwayo.
Kubikwe ukuba uBongani Mahole oleminyaka engu-37 wakhulumisana lomkakhe uNomakhimbile befuna ukuthengisa inkomo behluleka ukuzwisisana.
Umama wabantwana wahamba ngakibo watshiya abantwana loyise. Ubaba lo uthe sekuntambama wabaphekela ilambazi wabafakela itshefu elambazini wabanika badla. Yena wasuka wayazibophela egangeni lapho atholwa khona ngumkakhe esefile.
Abantwana batholakala bethe daca bephila bathwalelwa esibhedlela seGweru lapho abalaliswe khona bobathathu umumo wabo usesimeni esibi. Umzimba kamuyi lawo wathwalelwa esibhedlela ukuba uyehlolwa imbangela yokufa kwakhe.
uInspector Emanuel Mahoko
Intatheli ikhulumisane lesikhulumi samapholisa eGweru uInspector Emmanuel Mahoko oveze ukuba udaba lolu balalo.
“Indaba le siyitholile, sisayiphenyisisa. Sithanda ukukhuthaza uzulu ukuba adinge uncedo ebantwini abafundela ukweluleka kumbe kunkokheli zesigaba nxa ethe wahlangana lohlupho,” kubika uInsp Mahoko.
