uMthunywa
Ethel Ncube
KULOMAKOROKOZA weMbalabala obezama ukubulala umngane wakhe, ofe ngoLwesibili kuyonale iviki kulandela ukuwela phakathi kwegodi elitshonayo emgijimisa.
UPrince Luphahla obegebha igolide duzane lomfula uMzingwane ufe ngesikhathi egijimisa umngane wakhe uMthokozisi Mnethwa efuna ukumgamula ngehloka.
Ekhuluma lentatheli omunye wabomakorokoza bakule indawo uMnumzana Amos Dube uveze ukuba balesithuli ngokutshona komunye akade besebenza laye.
“ULuphahla waxabana lomngane wakhe uMnethwa, uLuphahla wasedobha ihloka wamgijimisa, ngokusweleka kwenhlanhla wasewela phakathi kwegodi elitshonayo engananzeleli wahle wafela phakathi.
“UMnethwa uthe ebona uLuphahla esewele phakathi kwegodi wabiza abantu bazama ukumkhipha kodwa waphuma esedlule ngoba wayelimele kakhulu ekhanda,” kubika uMnu Dube.
Uqhubekele phambili eveza ukuba lokhe bebuzana ngendaba le ukuthi umuntu athi efuna ukubulala kufe yena.
“Lokhe singelamathe ukuthi umuntu athi efuna ukuqeda umphefumulo womunye kufe yena njani kunzima lokuthi sikuzwisise kodwa yinto eyenzakeleyo sibili.
“Sisadidekile sibili ngoba kukhanya ubevele egijima ekhangele lo abemgijimisa wehluleka ukubona igodi ebeliphambi kwakhe,” kutsho uMnu Dube.
Iphephandaba likazulu lixhumane lesikhulumi samapholisa esabelweni seMatabeleland South uChief Inspector Philisani Ndebele ovumileyo ukuba udaba olunjalo lufikile endlebeni zakhe.
“Udaba lomuntu owele emgodini wafa egijimisa omunye efuna ukumbulala silutholile. Ngikhuthaza abantu ukuthi bayekele ukwemba igolide endaweni ezingavunyelwayo, sekulahleke umphefumulo ngenxa yokwemba endaweni ezingavunyelwayo njalo abantu bafunde ukuhlalisana ngokuthula,” kuphetha uChief Insp Ndebele.
