uMthunywa
Ethel Ncube
ZISAKHAKHAMELE izakhamizi zelokitshini lePumula South koBulawayo ngesenzo senye indoda efike kwenye indlu idinga indlu yokuloja yasicunulwa yimpendulo eyitholileyo yakhipha umbhobho yadubula umninindlu andubana idliwe ngumnyama.
Isehlakalo lesi esilokhu siyindida senzakale ngoLwesibili kuyonale iviki ntambama.
Umetheswacala ocatshangelwa ukuba angaba leminyaka engu-45 yokuzalwa kubikwa wafika waqoqoda endlini kamamangala wavulelwa wasechaza ukuthi udinga indlu yokuloja.
Kubikwa umninindlu wamtshela ukuthi akula umetheswacala wabuye wabuza ukuba akula yini kwenye indawo lapho angathola khona indlu yokuloja, bamtshela futhi ukuthi akula, yena wazonda wakhupha i-pistol esikhwameni wadubula umninindlu kanye esiswini qede wadliwa ngumnyama engabonwanga muntu.
Umamangala wasala ehlaba umkhosi esedinga uncedo kodwa umetheswacala wayesethe nyawo ngibeletha wadliwa ngumnyama.
Intatheli ixhumane lesikhulumi samapholisa koBulawayo uInspector Abednico Ncube obike ukuba badinga indoda eyenze icala leli.
“Sidinga indoda ebigqoke isikipa se-golf lebhulugwe eliyikhakhi eyafika yadubula umuntu ePumula South ngoLwesibili ebusuku. Sicela ongabe embonile abikele amapholisa aseduzane laye. Sixwayisa uzulu ukuthi ahlale ekhiyile iminyango njalo bangavuleli abantu abangabaziyo,” kuphetha uInsp Ncube.
