uMthunywa
YiNtatheli kaMthunywa
KULENDODA yeZaka eMasvingo eyehluleke ukuzibamba isizwa ukuba umkayo usethandana lenye indoda, nanko isuke emzini wayo yayadubula uyise wendoda esithandana lomkakhe.
Kuvele ukuthi uAmos Mutamba wathi esizwa ukuba umkakhe oseSouth Africa usethandana loCleopas Mutero waqonda ngakibo kwaleyondoda wafika wadubula uyise wayo, uPitiros Mutero oleminyaka engu-64 yokuzalwa ethi umkhawulisela ukuba umntanakhe uthandana lomkakhe.
Kubikwa uMutamba walanda uMutero emzini wakhe esiyakhulumisana laye ngokuthandana komntanakhe lomkakhe kodwa behluleka ukuzwanana enkulumeni uMutamba, wasesithi lothu esihlalweni wadubula uMutero kanye esifubeni andubana amfulathele esethe daca phansi.
Isikhulumi samapholisa eMasvingo uInspector Kudakwashe Dhewa uthe udaba olunjalo selusemthethwandaba.
“Indaba le, ibikhona kodwa isingene emthethwandaba weChiredzi,” kuphetha uInsp Dhewa.
