uMthunywa
Thokozile Mbedzi
ZILOKHU zithithibele izakhamizi zesigabeni seNdibe eGwanda ngemva kokuba enye indoda idubule ijaha ebicabangela ukuthi lithandana lendodakazi yalo, uMthunywa uyakuveza lokhu lamhlanje.
Umetheswacala uEdson Sibanda oleminyaka engu-45 yokuzalwa udubule uJustice oleminyaka engu-27 mhlaka 11 Nhlangula ngoba esola ukuthi uthandana lendodakazi yakhe.
Ekhuluma lentatheli kaMthunywa, uMnumzana Bathabile Moyo uthe isenzo sikaSibanda sethuse isigaba sonke.
“Kukalutshwana ukuthi emaphandleni kuzwakale indaba zokudubulana. Kukhanya uSibanda wezwa amahemuhemu okuthi uJustice uthandana lendodakazi yakhe kungakho wamlanda ngesikhathi etshaya izitina wafika wamtshaya ngempama.
“UJustice wasezonda wakhipha ingqamu esikhwameni wathi esondela kuSibanda yena wahle wakhipha i-pistol wamdubula esifubeni wafa,” kulandisa uMnu Moyo.
UMthunywa uzwe ukuthi uJustice esedutshulwe wazama ukubaleka kodwa waphela amandla wawa.
UMnu Moyo uqhubekele phambili wathi isenzo lesi sizaletha umkhuba omubi esigabeni ikakhulu phakathi kwentsha.
“Sisevalweni ngoba abatsha bangahle bafunde umkhuba omubi ngesehlakalo lesi esenzakeleyo,” kulandisa uMnu Moyo.
Imizamo yokuthola ulwazi ngecala leli kusikhulumi samapholisa esabelweni seMatabeleland South u-Assistant Commissioner Paul Nyathi yehlule ngoba ubesemhlanganweni.
