Nkosilathi Sibanda
OWAKE wabangunozinti weqembu leHighlanders uSmart Moyo usetshayelwe ihlombe ngokukhokhela izakhamizi zeNyamandlovu ekusunguleni uhlelo oluzaphathisa ithalenta elisakhulayo kumdlalo wenguqu kulindawo.
Isiqinti seNyamandlovu saziwa ngokulima kodwa kuminyaka ezayo, amaqembu enguqu azabe esephithizela khona, edinga abadlali, ngokutsho kwenhlanganiso entsha eyeNyamandlovu District Football Association (Nyadifa).
Inhlanganiso le isungulwe ngabalimi behlose ukuthi bavulele intsha yakulindawo amathuba okuthi izibonakalise kwezemidlalo, itshiyane lezidakamizwa lobuvila.
UMoyo ungomunye wabalimi eNyamandlovu njalo ungumongameli weNyamandlovu District Football Association.
Njengazo zonke indawo kuleli, eNyamandlovu sekuvele ukuba kulabantwana asebephatheka kuzidakamizwa lokuthanda ezocansi. Abazali bakhathazekile ngalokhu, bakubona kufanele ukuthi kubotshwe icebo lokusungula imidlalo.
Inyathelo lezakhamizi zeNyamandlovu lezi lisekela inhlelo zikaHulumende zokuphakamisa abasakhulayo emaphandleni kwemidlalo, ngaphansi kweNational Development Strategy 1 (NDS1).
Uhlelo lwe-NDS1 lukhuthaza ukusungulwa kwemidlalo kundawo ezikade zavalelwa phandle kungqubekela phambili, ikakhulu lezo ezingaphandle kwamadolobho.
Izakhamizi zeNyamandlovu zibikele iphephandaba likazulu ukuba zaqala ngokuqoqa umqhudelwano owadibanisa amaqembu alitshumi lanye ngenyanga edluleyo, kunkezo ebizwa ngokuthi yiNyamandlovu District Football Association’s Farmers Cup.
Kubikwa kumidlalo le kwavela ukuthi kulabadlali abalethalenta kumaqembu aziwa edlala inguqu yobungane. Amaqembu afinyelela kusigaba se semi-final agoqela iMakhokhomba Pirates, Siyabangena, Brave Lions leNyamandlovu Football Club.
Iqembu leNgoma Football Club laba yintshantshu ngemva kokunqoba iSiyabangena nge 4-0 enkundleni yeNgoma Stadium.
Ekhuluma emele inhlanganiso yeNyamandlovu District Association uMoyo uthe kulandela ukuqhuba kakuhle umqhudelwano wabo, bakhangelele ukusungula iligi ngesizini ezayo.
“Silethalenta elicatshileyo lapha eNyamandlovu, okumele livunjululwe. Sifuna ukuvikela abantwabethu bengenzi into ezimbi ezizaphambanisa impilo zabo,” kutsho uMoyo.
“Okwakhathesi silamaqembu alitshumi lanye, sifuna ukuthi kusiyafika umnyaka ozayo sivuse iligi lapho okuzancintisa amaqembu la. Kuligi le yikho esizavula amehlo sithaphe ithalenta esilitshengisa kumaqembu amakhulu kuleli.”
UMoyo uthe okumqoka kubo yikuthi abadlali abasakhulayo kulindawo bathole amathuba afana lalawo akholiswa ngabanye babo abasemadolobheni.
Uthe nxa sebehlanganise iligi, bazacela ukuba yingxenye yenhlanganiso yeSport and Recreation Commission leZimbabwe Football Association.
“Ukusebenzelana leSport and Recreation Commission kubalulekile ngoba yibo abanikazi bemidlalo. Kuzanikeza lenhlanganiso yethu isisindo.
“Sicela umphakathi usincedise ekuthini sigcwalisise amaphupho abantwabethu. Sinxusa abamabhizimusi abafuna ukusincedisa kulumsebenzi,” kutsho uMoyo.
UMoyo uthe ekupheleni kwalumnyaka inhlanganiso yabo, ibambene lezakhamizi, izaqoqa omunye umqhudelwano lapho amaqembu azadlalela inkezo yenduna uDeli, inkokheli yomdabu kulindawo.