Udonsi lwabaPostoli luncoma uDlelas

04 May, 2023 - 00:05 0 Views
Udonsi lwabaPostoli luncoma uDlelas Madlela Skhobokhobo

uMthunywa

Nkosilathi Sibanda

“Bakithi, angilawo amanengi. Ngithanda ukubonga kuDonsi lwabaPostoli. Akukho lula ukuthi abantu bathathe isikhathi sabo, bathathe lamathalenta abo babhale ingoma ngami . . .”

Ukhulume waphosa wehlisa inyembezi umculi wodumo kuleli uMadlela Skhobokhobo ngesikhathi ebeka amazwi kulandela ukukhitshwa kwengoma emayelana ngaye, liqembu elisacathula kwezomculo wokholo, Udonsi lwabaPostoli.

Ingoma le, ethi uMadlela, igqugquzela imisebenzi kaMadlela Skhobokhobo, imbonga ngokuthuthukisa ezomculo kulumhlubulo welizwe.
Lokhu kuza kulandela umkhosi lapho uMadlela ethule idlalade lakhe elithi “Kwamu Kwamu” koBulawayo kunyanga edluleyo. Idlalade leli kubikwa selithokozise abanengi kuleli laphetsheya kunkundla zokuxhumana ebulenjini.

UMadlela uthe uzizwa ethintekile ngokuhlonitshwa akunikezwe liqembu lezokholo leli, wathi akukho okwedlula ukuphakanyiswa ngalolu hlobo.
“Isikhathi esinengi sijayele ukukubona nxa umuntu engasekho emhlabeni. Kodwa nxa uthi usaphila, abantu bekubhalele ingoma, kumele ubonge,” kutsho uMadlela ekhuluma lentatheli yephephandaba likazulu ngoLwesibili emini.

Uthe kaqalisi ukuthola inhlonipho yaleli izinga ngoba sebebanengi abantu abamenzela okuhle.
“Okunye angeke sikuthi bhadla ebantwini kodwa ngiyatsho ukuba kulabantu abanengi abangenzela okuhle.

Abanye ngaba ngidwebela amapikitsha, abanye ngamankampani asebenzelana lami ukuthengisa impahla yabo. Konke lokhu yikubonga ithalenta engiliphiwe nguNkulunkulu. Ngiyabonga kuDonsi lawabaPostoli.”

UDonsi lwabaPostoli lubika ukuba lwahlabelela uMadlela ngoba kunguye owabakhuthaza ukuthi baphakamele phezulu kwezomculo lokuhlabela ngendimi zakuleli.

Umkhokheli weqembu leli uNqobani Siwela uthe ingoma yabo ngoMadlela imumethe isibongo esikhulu ngomculi lo. Udonsi lwabaPostoli liqembu elasungulwa ngomnyaka ka-2020 lapho uSiwela abika bafuqwa yikulandela umculi we-South Africa uThulani Manana.

“Ingoma le, uMadlela, yingoma encoma imisebenzi yakhe ekuphakamiseni ezomculo lokuzithokozisa edolobheni lakoBulawayo lakumhlubulo ongezansi yelizwe,” kutsho uSiwela.

“UMadlela simbabaza njengo mzali ngoba useluleke kokunengi. Wasikhuthaza ukuthi sihlabele sisebenzisa indimi zethu njengabantu abaNsundu ukuze silondoloze amasiko lokuba yithi kwethu.”

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds