uMthunywa
KUDLWENGULWE intombazane eleminyaka engu-16 yakoNongoma eSouth Africa ethathwe ngamadoda amahlanu ayithumba izinsuku ezinhlanu etshintshana ngayo ngocansi, qede ayilaxaza egangeni atshaya utshani.
Umamangala esingeke samqamba ngebizo ngenhloso yokumvikela, kuthiwa wehlelwe yilesi sehlakalo emuva kokuthunjwa ngamadoda ngoLwesine lwesonto eledluleyo.
Umthombo osondelene lodaba, uthi lintombazane ibithunywe komunye umuzi ngesikhathi ihlangana lamadoda abehamba lowayelisoka likababakazi wayo. Kuthiwa bayekele yadlula yaya kulomuzi kanti bayakhela uzungu.
Ithe iphenduka bayibamba bayikhomba ngesibhamu bayifaka emoteni beyibophe emehlweni ngendwangu.
“Sengathi indwangu ibikhanya, wakwazi ukubona ngoba uthi imoto yabheka ngasePhongolo igijima. Bafika bamfaka endlini eseduze komgwaqo obheke oPhongolo okuyilapho-ke abamphendule khona umfazi wabo,” kulanda umthombo.
Kuthiwa abanye babemdlwengula ngaphandle kokufaka ijazi lomkhwenyana kanti abanye babelifaka.
Kuthiwa bamdlwengula bephindelela izinsuku ezinhlanu bengamniki kudla namanzi okugeza. Abangakibo kwale ntokazi bese beyidinge baze bakhathala bengazi ukuthi itshonephi sekuduma amakhanda kibo.
Kuthiwa ngeSonto omunye walaba balisa watshayela unina kamamangala ucingo ebuza ukuthi engathanda bayitshiye ngaphi indodakazi yakhe.
Lokho kwalandelwa yikuthi lentokazi bayilaxaze kwenye indawo okuthiwa kuse koMinya khona koNongoma basuka lapho babaleka.
Uthi umthombo lentokazi isathuthumela emuva kwalesi sehlakalo iyabonakala ukuthi kusazothatha isikhathi ukuyedlulisa le nto eyenzakalayo.
Okhulumela amapholisa KwaZulu-Natal uLieutenant Colonel Zwane uthe amapholisa athungatha abantu abenze lelicala kodwa bekungakabotshwa muntu.- Ubulembu
