uMthunywa
Wayne Ncube
“LISIKO lakithi ukuthi ngibe ngowokuqala ukuya lawe emacansini, ngeke ukwale lokho ngoba impilo yakho ingaba lukhuni.”
La ngamazwi enye indoda (ibizo siligodlile) ehlala kweleSouth Africa kodwa ezalwa kuleli, ebisiqede umnyaka wonke ihlukuluza indodakazi yayo eleminyaka engu-18 emacansini.
UMthunywa uzwe ukuthi umetheswacala olokhu esadingwa ngamapholisa oleminyaka yokuzalwa engu-39 wathi evakatshelwe yindodakazi yakhe wayihlukuluza emacansini ngemva kokuyitshela ukuthi kulisiko lakibo ukuthi abe ngowokuqala ukuhlangana layo emacansini.
Kubikwa abazali bakamamangala behlukana ngomnyaka ka2016 kungakho kusukela lapho umamangala ubehlala lometheswacala eJohannesburg.
Kuzwakale njalo ukuthi kusukela ngenyanga kaMbimbitho nyakenye umetheswacala ubesehlala ehlukuluza umamangala njalo wahle wamekelisa lesikolo.
Umamangala uthe efika koBulawayo wayabikela amapholisa ngesenzo sikayise.
Isikhulumi samapholisa akoBulawayo uChief Inspector Precious Simango sifakaze ukuthi udaba olunjalo lusezandleni zabo njalo basaludingisisa.
“Kukhanya okwenze umamangala wekela ukuveza indaba le okwesikhathi eside yikuthi wayethukile ngoba uyise ethe uzehlelwa ngokubi angavele atshele umuntu ngendaba le,” kuchaza isikhulumi samapholisa.
Kubikwa umamangala wathi esebuye ukuzovakatshela unina wamtshela ngayekwenziwa nguyise andubana kubikelwe amapholisa.
“Ngithanda ukuxwayisa ikakhulu omama ukuthi bangatshiyi abantwana abangamankazana labesilisa kanye lokuthi abantwababo bayehlala labesilisa ngoba bangehlelwa yizehlakalo ezifana lalesi,” kuphetha uChief Insp Simango.
