uMthunywa
INHLANGANISO ye SmileAction International ithi kungumlandu womuntu wonke ukuphatheka ekulwiseni udlakela emakhaya ikakhulu kubomama nanko phela kukhanya amacala aphathelane lalokhu ayenyuka kusukela kwaqala iCovid-19 kuleli ngomnyaka ophelileyo.
Ekhuluma ngesikhathi iZimbabwe ibambana lomhlaba wonke jikelele kunanzwa insuku ze16 Days of Activism Against Gender-Based Violence ongumqondisi kunhlanganiso le uTatenda Mamina uthe kusukela kwaqala ubhubhane indaba zokuhlukuluzana emakhaya sezakhuphuka.
Uthe amanye ala amacala awamangalwa emapholiseni ngenxa yezizatho ezitshiyeneyo njalo abanye abahlukuluzwa ngalindlela bacina bethatha impilo zabo ngenxa yokuphelelwa ngamacebo okudinga usizo.
Uthe ngenxa yodlame emakhaya eminye imizi seyachitheka okwenza abantwana basale behlupheka.
“Siyazama ngazo zonke indlela ukulwisa udlame osolwandile ezindlini kusukela kwaqala iCovid-19. Ucwaningo olwenziwayo lwaveza ukuthi udlame ezindlini lwanda kakhulu kusukela kuqala iCovid-19 le lockdown okwenza abantu abanengi bazibulala.
“Abanye baqala ukubambabamba imithi ukuze baziphathise kodwa inengi lananzelela ukuthi akulamuthi ongasiza ohlukuluzwayo okwakucina kubangela ukuthi bacine babulalane ezindlini.
“Udlakela alulunganga luyaphambanisa impilo zabantwana abakhula emizini lapho okulodlame.
Kungumlandu womuntu wonke ukulwisa udlame emakhaya. Abantwana abakhula bebona abazali behlukuluzana ngalindlela bacina bekwenza labo nxa sebebadala ngoba bebona angani yiyo indlela yempilo kukanti hatshi, udlame lubi,” utsho njalo.
Uthe omama kumele baphathiswe benelise ukuzisebenzela ngokufundiswa imisebenzi yezandla nanko phela ucwaningo lwaveza ukuthi olunye udlakela luqala ngoba sokulendlala ezindlini.
Uthe inhlanganiso yabo ilezinhlelo ezitshiyeneyo zokufundisa omama imisebenzi yezandla ukuze benelise ukuzenzela imali yokuselela izimuli bengahlali bengabacela imali kubobaba.
“Sakubona kumqoka ukufundisa omama kunye labobaba imisebenzi yezandla ngoba nxa bengelakho okokwenza yikho lapho okusuka kube lodlakela khona.
“Kodwa nxa omama bangenelisa ukuzimela balakho ukuqhubeka ngempilo yabo ngokuthula,” kuphetha uMnumzana Manina.
