uMthunywa
Wayne Ncube
KULENDODA yelokitshini leMpopoma koBulawayo edinga uncedo lwemali engange $6 000 masinyane ukuze iyekwelatshwa imvukuzane yengqondo ingakadluleli kusigaba esibi.
UMnumzana Ndabezinhle Maphosa oleminyaka engu-49 yokuzalwa watholakala ukuthi ulomkhuhlane wemvukuzane yengqondo mhlaka 2 Mpandula 2019 andubana ayebonwa ngodokotela abazingcitshi kumkhuhlane lo abayibo abafuna imali engange $6 324.
Indoda le eyamiswa umsebenzi, isiphila ngokuthengisa ukuze igcine imuli elamalunga ayisikhombisa.
Ekhuluma lentatheli ulandise ngokuqala komkhuhlane lo.
“Ngiqale ngitshitsha esibhedlela ngihlutshwa likhanda kusukela ngoMbimbitho ngomnyaka odluleyo, kuthe sebebone umkhuhlane lo ngaqala njalo ukukhathazwa ngamehlo ngoMpandula,” kulandisa uMnu Maphosa.
Ngaphezulu kwendleko zokwelatshwa eze $6 324 uMnu Maphosa kumele abone udokotela wamehlo eRichard Morris mhlaka 15 Zibandlela.
“Odokotela bathi umkhuhlane lo uyingozi kakhulu, ngakho kudingakala ukuthi ngelatshwe kusemasinya ingqondo ingakabi lobomvu ngoba kungenzeka ukuthi icine isiba lobomvu bathi kulakho ukungibulala.
“Ngiyacela kuzulu wonke ongabe esenelisa ukuthi angiphathise ngithole ukwelatshwa yiloba ngemalini izangisiza,” kulandisa uMnu Maphosa.
Ongabe elesifiso sokunceda uMnu Maphosa angamthinta kunombolo zakhe ezithi 0771906352 kumbe aqonde endlini eMpopoma Block 95/7851.
