uMthunywa
Edson Khumalo
KULENINA elihlala eMahatshula koBulawayo elikhala ezimathonsi nanko phela lithi lithwele nzima ngokuhlutshwa ngelinye ilunga lama-satanist ngakho lidinga usizo.
Ekhuluma lentatheli kaMthunywa uNkosikazi Mmyana ulandise ngokuhlukuluzwa kwakhe okwaqala ngomnyaka ka2013.
“Ngithwele amagabha avuzayo njalo lokhu kwaqala ngomnyaka ka2013 ngisuka eNketa ngisizahlala ngapha eMahatshula North.
“Kulomunye owesifazane esakhula sonke sihlala emalokitshini owayevele esehlala eMahatshula kodwa ukufika kwami eMahatshula kukhanya akumjabulisanga nanko phela waqala ukungibuza ukuthi kungani ngimlandela.
“Wathi yena wasuka emalokitshini ngamlandela, wafaka umntanakhe eYunivesithi yeNust lami ngafaka owami kodwa ayisikho kuthi ngangimlandela, kwakusenzakala nje ukuthi sihlale endaweni efanayo siphinde sibe labantwana abafunda kuyunivesithi yinye,” kutsho uNkkz Mmyana.
Uthe ngemva kokutsho amazwi la umama lo (ibizo siligodlile) wamqalekisa ethi akulanto yakhe ezaphumelela.
“Ngemva kokutsho amazwi la waqala ukungihlupha ethi asitshayelane imali ngaze ngacina ngivuma.
“Satshayelana izimali kwathi sokulithuba lami lokuthi ngiphiwe imali wangitshela ukuthi ngizehluleka ukuyibhadala.
“Isimanga yikuthi ngemva kokwamukela imali yonke into engangiyenza yama, kwangasayi ndawo labantwana baphuma esikolo,” kulandisa uNkkz Mmyana.
Omunye wabomakhelwane ongathandanga ukuqanjwa ngebizo ethi lindaba ingabafaka ejele uthe ucabangela ukuthi kuliqiniso okutshiwo nguNkosikazi Mmngoba kusukela etshayelwa imali yonke into yakhe yahle yaqala ukungahambi.
UNkkz Mmyana uchazele intatheli ngokunyamalelwa kwakhe yimali okuyinto eyenzakala sonke isikhathi.
“Kwathi ekupheleni kuka-2013 ngifuna ukuyathenga inkomo zokuthengisa ebhutsha imali engange-$2 500 yawela esambuzini yanyamalala.
“Langesikhathi ngithengisa imota ngamphupha umama lo ethi kimi imota izathengwa emini ihola letshumi lambili lingakafiki kodwa imali yakhona kudala beyidlile. Lokhu kwenzakala njengokutsho kwakhe lumama, imali yacatsha ngasala ngibambe i$20 emalini yonke eyemota.”
UNkkz Mmyana ulandisele intatheli ngalokhu alala ekuphupha ebusuku.
“Akulaleki endlini engajikisa umama lo ongithwalise amagabha avuzayo, kwesinye isikhathi ngiyaphupha umkakhe engisenga amabele sankomo uchago luze luchitheke kuze kufike esiqendwini sokuthi bayafaka losane lumunye.
“Emavikini aphelileyo umama lo ngiphuphe engilanda wafika kimi watshintsha ubuso baba yisitho sikamama esigeliweyo sasala isicholo kuphume izinyo elingalingana lophondo lwembuzi lungihlabe isiphongo ludonse igazi, nxa ngithi ngiyavuka ngithole ngileqhubu elibuhlungu esiphaqeni lapha akade ehlabe khona ngezinyo lakhe.”
UNkkz mmyana uphethe ngokulayela kuntatheli ukumdingela uncedo ebantwini benkosi abangenelisa ukumsindisa kuloludubo nanko phela inina leli limdlisa luklubhu kusukela eminyakeni eyisithupha edluleyo.
