uMthunywa
INDODA ye-Eyrecourt eWaterfalls eHarare ife ngemva kokudilikelwa yinhlabathi yesiduli akade isigebha labanye bayo abahlanu ngenhloso yokutshaya izitina.
Umuyi lo uWellington Makusha Mwenye (32) ubesebenza njengonogada kwenye inkampani kodwa ubetshaya izitina labanye bakhe nxa engekho emsebenzini.
Isikhulumi samapholisa ezweni lonke jikelele uAssistant Commisioner Paul Nyathi uthe usadingisisa ngodaba lolu.
“Sisadingisisa ngodaba lolu, sizalithinta singaqeda uphenyo lwethu,” utsho njalo.
Intatheli zifike kule indawo zathola kulamapholisa akade elinde isidumbu salindoda njalo kulabantu akade belinde ukuthi sithwathwe sisiwe emotsha.
Abantu bebuthene ngakibo kaWellington
Omkhulu kulesisigaba ongu-branch chairman uMnumzana Prince Musarime uthe uzwe ubuhlungu ngesehlakalo lesi.
“Mina ngibizwe umuyi esevele esetshonile egqitshelwe yinhlabathi. Kubikwa utshayise emsebenzini wahle waqonda lapho esiyagebha inhlabathi yokutshaya izitina.
“Kubikwa baqale ukugebha inhlabathi kwaze kwafika ihola lika-9 ekuseni yikho lapho umuyi awelwe ligade elikhulu emhlane wahle wawela phansi wafa,” utsho njalo.
UMnumzana Langton Zhou ongumnewabo kamufi uthe uzwe esefonelwa ebikelwa ukuthi umnawakhe udilikelwe yinhlabathi yesiduli.
“Silahlekelwe kakhulu njengemuli nanko phela umuyi utshiye unkosikazi kanye labantwana ababili.”
UMnumzana Samuel Nhere owakhele eduzane lesiduli lapho okufele khona umuyi uthe uzwe ubuhlungu ngokwedlula emhlabeni kukamuyi.
“Amadoda la ahlala etshaya izitina esidulini khonapho njengendlela yokudinga ukuziphilisa lezimuli zabo.
“Bafike ekuseni njengensukwini baqala ukugebha inhlabathi kodwa ngezikhathi zama-9 ekuseni umuyi udilikelwe yisiduli wahle waphela khonapho,” kuphetha uMnu Nhere.
