uMthunywa
Thokozile Mbedzi
ZILOKHU zibabaza izakhamizi zeMzingwane eWest Nicholson ngemva kokuba amadoda amabili edilikelwe ngumgodi enye yafa ngeviki ephelileyo.
Kubikwa uNoel Gumbo oleminyaka engu-41 kanye lomngane wakhe uShadreck Dube abavela kuVillage 3 eWedza Block eMwenenzi badilikelwe ngumgodi otshona okwamamitha alitshumi ngesikhathi besimba igolide.
UMthunywa uzwe uShadreck wenelise ukuphuma phakathi komgodi lo engela ngitsho lenxeba wadinga uncedo.
Kubikwa abanye omakorokoza baphangisa bayamncedisa ukukhipha uNoel kodwa ngokuswelakala kwenhlanhla wathi esanda kukhitshwa wadlula emhlabeni.
Ekhuluma lentatheli uMnumzana Bekithemba Ngwenya ongomunye walabo ababekhona mhla wesehlakalo lesi uveze ukuthi bona bezwa uShadreck esebabiza edinga uncedo.
“Sezwa uShadreck ememeza ethi sebedilikelwe ngumgodi njalo uNoel lokhu ephakathi sagijima sayamncedisa ukukhupha.
“Sithe sesimkhiphile simbeka nje phandle wadlula singakenzi lomzamo wokuthi simuse esibhedlela. Lokhu kusidanise kakhulu ngoba besilethemba lokuba uzasila kodwa kwala.
“Abantu lokhe bebuzana ngengozi le ukuba kwenzakale njani ukuthi omunye angalimali kodwa omunye alimale bona bebesemgodini munye,” kulandisa uMnu Ngwenya.
Omele isikhulumi samapholisa esabelweni seMatabeleland South u-Inspector Loveness Mangena ebuzwa ngodaba lolu uvumile wathi solufikile ehofisini yabo njalo uzulu kumele atshiye umkhuba wokwemba igolide okungekho emthethweni.
“Udaba lwendoda edilikelwe ngumgodi yakhitshwa kodwa ngokuswelakala kwenhlanhla yedlula emhlabeni solufikile ehofisini yethu. Sithanda ukukhuthaza uzulu ukuthi ehlukane lomkhupha wonkwemba igolide okungekho emthethweni ngoba kuyingozi,” kutsho u-Insp Mangena.
