IGWETSHWE udilikajele inyanga yeGcilima, eMargate eyabanjwa ithengisela ipholisa izitho zomuntu izitshela ukuthi liyinyanga.
USibusiso Phumlani Ngidi obuye azibize athi ngowakoXolo (34) lomsizi wakhe uKhanyisile Winnie Khusi (46) bagwetshwe udilikajele, yinkantolo eNkulu yeMgungundlovu izolo ngokubulala uMxolisi Langazana, ngomnyaka odluleyo.
Bobabili uNgidi loKhusi bavumile ukuthi babulala uMxolisi.
UNkosikazi Natasha Kara okhulumela iNPA KwaZulu-Natal, uthe isitatimende sokuvuma icala esibhalwe yilaba ababili sithi uNgidi watshelwa ngenye inyanga ayibiza ngoThemba ukuthi nxa efuna ukuba lamandla amakhulu okwelapha kumele abulale umuntu.
Uqhuba athi lolu daba waluxoxela unkosikazi wakhe, izintombi ezimbili loNkosikazi Khusi wabacela ukuthi bamsize.
Ngemva kokumbulala bathi bagebha igodi bamngcwaba esigodlweni sakhe uNgidi. Ngemva kwenyanga ezimbalwa babuye bamphanda, ezinye izicubu zakhe bazifaka ebhodweni.
Ummeli woMbuso u-Advocate Mbongeni Mthembu uthe isenzo sikaNgidi siyibulwane obuhambisana ledimoni. Uthe umufi wabulawa ngenhloso futhi kuhleliwe. — Ubulembu