uMthunywa
Ethel Ncube
KUDABA olutshwaqisa umzimba kulendoda yeNtalale eGwanda okubikwa iqale yadakisa abantwana ababili omunye ofunda ugwalo lwesine lomunye ongakangeni esikolo andubana abadlwengule, uMthunywa uyakuveza lokhu lamhlanje.
Umetheswacala uPhilani Sebata oleminyaka yokuzalwa engu-25 kubikwa ngeviki ephelileyo unike abantwana laba utshwala ukuze badakwe ngenhloso yokuba abadlwengule.
Kubikwa umetheswacala uthe eqeda ukwenza lokhu wathi nyawo ngibeletha.
Ekhuluma loMthunywa omunye wezakhamizi zakule indawo owale ukuchaza igama lakhe uthe kulojaha oleminyaka engu-25 odlwengule abantwana ababili abakumfundo yaphansi.
“Indaba enjalo yenzakele, umfana wakoSebata lo kuthiwa ulande abantwana laba akade besele bodwa ngakibo wafika wabanika utshwala. Abantwana laba omunye ukugwalo lwesine kumfundo yaphansi omunye ukuECD-A.
Uthe ebona ukuthi abantwana laba sebedakiwe uqale wadlwengula owokuqala phambi komunye waphinda isenzo esifanayo komunye laye ekhangele,” kuchaza umfakazi lo ongathandanga ukuqanjwa ngebizo.
Kubikwa umetheswacala lo uthe eqeda ukwenza isenzo lesi wahle wabaleka njalo kaziwa ukuthi uqonde ngaphi.
Ekhuluma loMthunywa ukhansila wakule indawo uMnumzana Costa Ndlovu uveze ukuba abazali babantwana abakafiki kuye.
“Indaba yokudlwengulwa sengiyizwile ikhulunywa kodwa-ke abazali babantwana kabakafiki kimi.
“Uhlupho olukhona yikuthi abantu abangitsheli izinto ngesikhathi esifaneleyo ngabe sebebuyile lapha khathesi kimi ngabancedisa lapho engincedisa khona,” kuphetha uKhansila uNdlovu.
