Udaba lweZifa loMliswa luseBulawayo High Court

YiNtatheli kaMthunywa

KUPHINDELWA emthethwandaba ngoLwesine kusiyacubungulwa udaba olulethwe eBulawayo High Court nguThemba Mliswa owavalelwa phandle kulabo abamele bavotelwe kukhetho kwebhodi yeZifa mhlaka 25 Zibandlela.

UMliswa wabangomunye abahlanu okwathiwa akalungelanga ukukhethwa ukuthi bakhokhele iZifa. Isinqumo lesi senziwa yiZifa Ethics and Integrity Committee ekhokhelwa ligqwetha lodumo uMuchadei Masunda.

IZifa Ethics and Integirty Committee yasungulwa ngemva komnhlangano womnyaka owabakhona mhlaka 22Lwezi kumnyaka odluleyo. Impumela yomhlangano lo kwaba yikwamukela isisekelo sombuso.
Abaphathi abangu-78 yibo abavuma lolugwalo lwesisekelo sombuso esitsha, esizakhokhela ukukuqhutshwa kokhetho. Okunye kugoqela ukwethembeka lokuba lama-Ordinaty Level eneleyo kumbe okulinganayo kulabo abafisa ukuba ngomongameli beZifa lomsekeli wakhe.
UFarai Jere, Gift Banda, Walter Magaya, Benjani Mwaruwari loMliswa yibo bodwa kuzikhundla zombili eziphezulu abavalelwa phandle.

UMliswa ubeseBulawayo High Court ephelekezelwa ligqwetha lakhe uMusindo Hungwe ephathiswa nguTendai Madamombe abeMD Hungwe Attorneys At Law abeHarare ngoLwesibili.
Umlandu awethesa abeZifa abamvalela phandle ngowokuthi kabaselalungelo lokuba bezibambile ngoba amandla abo aphele ngo2022.

Kusolwa njalo ukuthi kungani iFifa yaxhamanda ngokuthi babebelokhe bebambile njalo kuqale phezulu ukukhetjha inkokheli zenguqu. Okuyimvama yikuthi kukhethwa kusuka phansi kusiyaphezulu.
Umdlalo ubusuleminyaka emithathu ungela bukhokheli obugcweleyo ngemva kokuhlaliswa phansi kukaFelton Kamambo labanye bakhe ngo2022.

UBanda wabamba okwenyanga ezingafika itshumi lane wasemiswa mhlaka 11Ntulikazi 2023 ngabenhlanganiso ebusa ibhola umhlaba wonke, iFifa sebethe kame kube leNormalisation Committee.
Likhomithi yaphiwa umlandu wokuthi kubelokhetho mhlaka 25Zibandlela walumnyaka.
UMagaya loMliswa olwabo udaba baluhanjiswe emthethwandaba.

IHigh Court yakoBulawayo ithe akubuthwane njalo ngoLwesine njengoba ngoLwesibili amagqwetha eZifa abeseHarare kundaba kaMagaya.
Yena ekaMagaya izangena eHarare ngoLwesihlanu.

Sokulokwesaba ukuthi ukhetho lolu lungamiswa ngamadale njengoba uBanda loMwaruwari behambise udaba lwabo kuCourt of Arbitration for Sport eSwitzerland.
UHungwe uthe ngemva kukaJustice Nduna kuhlanganwe ngoLwesine: “Baziswe lamhlanje ekuseni abeZifa, amagqwetha abo abeseHarare kwelinye icala.”
UDerek Kossam omele amagqwetha eZifa akade eseHarare laye wagcizelela ukuthi abomdlalo wenguqu bebengaphiwanga isikhathi esiqondileyo ukuthi baluhlaziye udaba.