uMthunywa
Brandon Moyo
UKAPUTENI weqembu lesizwe lekhilikithi uCraig Ervine uhlangane leqembu le-Test izolo lapho akade belungiselela khona ukudlala leWest Indies ngoMgqibelo enkundleni yeQueens Sports Club koBulawayo
U-Ervine, uzabe ephethe isikhundla sikakaputeni weqembu uSean Williams owalimalayo.
UWilliams wehluleke ukulolonga labanye izolo ngesikhathi beqalisa ukulungiselela beliqembu ngemva kokuphela kwemidlalo yokuzilungiselela edlalwe eBulawayo Athletic Club (BAC).
I-West Indies layo izilungiselele izolo emini.
IZimbabwe imemezele iqembu elizadlala le West Indies ngoLwesibili, njalo izabe ithembele ku-Ervine lo Gary Ballance abalolwazi ngomdlalo omude. Abadlali bobabili sebelesikhathi eside bedlala.
U-Ballance kulindwe ukuthi enze umdlalo wakhe wokuqala wama-Test kuma-Chevrons ngemva kokusuka kwakhe kuqembu leNgilandi ngomnyaka ophelileyo.
Phakathi kweqembu kukhona abadlali abayisikhombisa abangakaze badlale ikhilikithi yohlobo lwe-Test ekuqaleni.
Abadlali laba nguTafadzwa Tsiga, Joylord Gumbie, Kudzai Maunze, Innocent Kaia, Tanunurwa Makoni, Bradley Evans loTanaka Chivanga.
UDonald Tiripano lo Chamunorwa Chibhabha, owake waba ngukaputeni welizwe kumidlalo emfitshane babizwe kuqembu ukuze bengeze ulwazi abalalo.
Umqeqetshi weZimbabwe uDave Houghton ulindele ukuthi abafana bakhe benze kuhle mhla bedibana leWest Indies ngempelaviki. UHoughton uthembele ukuthi iZimbabwe inqobe ngoba uthe ulolonge abadlali bakhe baqina.
Ama-Chevrons kakaze anqobe emdlalweni yama-Test kodwa umqeqetshi lo ulethemba lokuthi iqembu lakhe lizakwenza kuhle.
Umdlalo lo uzabe ungowokuqala oka Houghton kumhlobo weTest engumqeqetshi weZimbabwe ngemva kokuqala kwakhe umsebenzi ngomnyaka odlulileyo lapha athatha khona umsebenzi kuLalchand Rajput.
Craig Ervine
Iqembu leZimbabwe elizadlala le West Indies limi kanje :
Gary Ballance, Chamunorwa Chibhabha, Tanaka Chivanga, Craig Ervine (kaputeni), Bradley Evans, Joylord Gumbie, Innocent Kaia, Tanunurwa Makoni, Wellington Masakadza, Kudzai Maunze, Brandon Mavuta, Richard Ngarava, Victor Nyauchi, Milton Shumba, Donald Tiripano, Tafadzwa Tsiga.
