uMthunywa
Thokozile Mbedzi
KUDABA oluhlasimulisa umzimba kulendoda yeCrossini Tuckshop eHope Fountain koBulawayo ehlaselwe kabuhlungu ngamadoda akade ehlome ngamabhemba, ingqamu lamahloka batshiya beyikhiphe ilihlo lendlebe kanye lokumgamula isiphaqa lasemzimbeni wonke ngempelaviki.
Kubikwa indoda le elinyaziweyo ileminyaka yokuzalwa engu-29 njalo ngesikhathi oguluva laba befika ibilele kwelinye ikamelo elilapho okule-tuckshop khona.
Kwelinye njalo ikamelo elikuli tuck-shop bekulele owesifazane oleminyaka engu-26. Laba ababili baqhatshwe eCrossini Tuck-shop njalo bahlaselwe kuzakusa kunguMvulo.
Ekhuluma lentatheli kaMthunywa uMongameli Tshuma oyisakhamuzi uthe abakaze babone isihluku esingaka.
“Sehlelwe lusizi silapha simadolonzima. Izisebenzi zeCrossini tuckshop zihlaselwe ngoguluva ebusuku emadabukakusa baqala ukuqoqoda lapho okulala khona owesifazana ngoba lapha kuphekwa isitshwala lokuthengiswa amagrocery.
“Bathe beqoqoda bathi kowesifazane bafuna ukuthenga isitshwala owesifazana lo wangabavuleleli kodwa bagamula isivalo sezenge baze bangena phakathi baguduza bathola isikhwama sakhe sile US$50 bayithatha konke lama-grocery athengiswayo.
“Owesilisa asebenza laye esizwa umsindo wavuka wayangena endlini yomunye wakhe wahlangana lembila zithutha.
“Wathi engena wathola amadoda okungasatholakalanga inani lawo ethwele amabhemba, amahloka, amawaya lezingqamu bamxhonxha ilihlo laphuma lawela phansi.
“Ngemva kwalokhu bamgamula isiphaqa bamgwaza kanengi nengi baphinda njalo bamquma lendlebe yawela phansi. Kukhanya bamgwaza njalo inxeba elitshonileyo ehlombe esandleni sokudla lenyaweni lwesandla senxele. Utshaywe wasala ehlanza igazi ngomlomo elinye igazi liphuma ngamakhala. Oguluva bahle badliwa ngumswenya lo owesilisa wagijinyiselwa esibhedlela seUnited Bulawayo Hospitals lapho esesimeni esibi,” kulandisa uMnu Tshuma.
Isikhulumi samapholisa koBulawayo uInspector Abednico Ncube ebuzwa ngodaba lolu uthe solufikile ehofisini labo lapho esithi.
“Udaba lwendoda elinyazwe kubi yakhutshwa ilihlo lendlebe solufikile ehofisini lethu ngakho lusaphenyisiswa,” kuphetha uInsp Ncube.
