uMthunywa
Thokozile Mbedzi
KWENZAKALE ingozi elusizi eLyme Mine, eSigodini ngemva kokuba enye indoda ithe isebenza yacholwa ngumtshina wokugaya amatshe yasala izincezu.
Kubikwa uMnumzana Vusa Ndebele oleminyaka engu-23 ubezisebenzela efaka amatshe emtshineni omkhulu obizwa ngokuthi yi-boremill esebenzisa ifotsholo ngesikhathi kusenzakala lingozi. Ngokuswelakala kwenhlanhla usuke wasewela phakathi komtshina wacholwa wasala eyizicucu.
Ekhuluma lentatheli kaMthunywa uInspector Loveness Mangena uthe kubelengozi eLyme Mine lapho esinye isisebenzi esicine sibulawa ngumtshina.
“Kube lengozi emgodini ngesikhathi kuthelwa amatshe ku-boremill eLyme Mine, ngokuswelakala kwenhlanhla esinye isisebenzi esibizwa ngokuthi Vusa Ndebele ebesithela amatshe emtshineni ngefotsholo sihle sawela phakathi komtshina sacholwa.
uInspector Loveness Mangena
“Ekutheleni kwakhe amatshe ngefotsholo yikho lapho okuvele khona ingozi ngoba uhle wahakitshwa zinsimbi ze-boremill wahle wawela phakathi.
“Esewele phakathi yikho lapho ahle wacholwa ngumtshina lo ogaya amatshwe kwahle kwaba yikuphela kwakhe. Ngesikhathi becitsha umtshina ubesevele esecholiwe.
“Abembayo kumele bananzelele ngaso sonke isikhathi bahlale bevikele izisebenzi zabo emsebenzini ukuze kungabikhona ukulahlekelwa yimpilo mahlayana nje.
“Ingozi le ibingavikeleka ngabe bekulandelwe imithetho njengemfanelo.
“lzisebenzi kumele zihlale zivikelekile ngoba ziqakathekile,” kuphetha uInsp Mangena.
