uMthunywa
Nkosilathi Sibanda
INDLELA ziqonde enkundleni yeZimbabwe International Exhibition Centre lapho abathandi bomdlalo we-basketball abazabona ukudla kwamehlo kudibana amazwe amane kumncintiswano ye- Afro Basketball/ Can Qualifiers.
Amehlo azakuthi nhlo kumdlali wakuleli uVitalis Chikoko osuke eFrance ezimisele ukuthi ancede iqembu lesizwe linqobe. Lakanye ukwenzile.
UChikoko lo ophinda abengukaputeni welizwe uphenduke wabayintandokazi yomphakathi obubukele umdlalo weZimbabwe leMozambique ngoLwesibili ntambama.
IZimbabwe inqobe nge- 71-57 kumdlalo wakuqala.
Ukuze atshengisele ukuthi “unguthenjiwe” emdlalweni, uChikoko ungene enkundleni wafika waphosela amabhola ebhasikitini waze wathola imiklomelo elitshumi lambili. Bambalwa abadlali bakuleli abake benelisa lokhu kumidlalo yezinga laphezulu njengeye Afro Basketball/Can.
Imidlalo iqale ngoLwesibili, ikhangelelwe ukuthi igqitshwe mhlaka 28 Nhlolanja. Kuncintisa amazwe amane abalisa iZimbabwe, Zambia, Mozambique le-Angola. Imncintiswano le idlalelwa ngabesilisa labesifazane.
Imidlalo kwakumele iqale ngoMvulo kodwa ngenxa yokuphuza kwamanye amaqembu, akuzange kwabalula ukuthi ezinye ziqalise. Phezulu kwalokhu, kube lokudana okukhulu kulandela ukukhalala umncintiswano okwenziwe ngamazwe eSouth Africa leMalawi ngesikhathi esifitshane. Lokho kutsho ukuba sekwehle isisindo somncintiswano ngoba iSouth Africa leMalawi ngamazwe alodumo ngethalenta lomdlalo we-basketball.
Umongameli weBasketball Union of Zimbabwe uJoe Mujuru ubike ukuba ukuvulwa kwemidlalo kuqhube kakuhle.
UJoe Mujuru
“Isiqalile imidlalo yethu ye- Afro Basketball/ Can qualifiers. Sibonga uzulu koBulawayo ngokwamukela amaqembu avela phetsheya kunye lokubukela imidlalo yethu. Silethemba lokuthi sizaqhuba kakuhle, sithole intshantshu ngokufaneleyo,” kutsho uMujuru ekhuluma lentatheli yephephandaba likazulu.
