uMthunywa
“Isizini entsha iqala mhlaka 22 Mfumfu, ngilethemba lokuthi ngizalifikisa kuPSL iqembu,” lawo ngamazwi kaTapuwa Kapini ngelanga esayina isivumelwano sokuba ngunozinti weSekhukhune United.
UKapini ungena kuleliqembu kulandela ukuxotshwa kwakhe kuHighlands Park kumaviki amaviki adluleyo. ISekhukhune United idlala kuligi ephansi eyeGladAfrica Championship.
Unozinti lo kusele kancane ukuthi aphenduke kuqembu lakhe lakudala iHighlanders, kodwa ngenxa yokuthi ubesehlelweni lukamqeqetshi weHighlands Park uJohnny Ferreira, kubelula ukuthi athole umsebenzi omutsha.
“Ngisayine isivumelwano esitsha leSekhukhune United. Umgcinisihlalo wayo ungitshele ukuba kade bafuna ukuthi ngibadlalele ngakho ngitholakale ngesikhathi esifaneleyo,” kutsho uKapini.
Umdlali lo oseleminyaka yokuzalwa eyi-36, uthenjiswe ukufundiswa ikhosi yokuqeqetsha iqembu leSekhukhune United.
“Bathe nxa ngifuna ukuyafundela ubuqeqetshi bazangincedisa.”
NgoLwesithathu uKapini ubonakale enkundleni eselolonga labanye abadlali, kulungiselelwa isizini ezaqala ngoMfumfu. Kukhangelelwe ukuthi adlale kuSekhukhune United okwenyanga ezilitshumi lambili.
UKapini ukhangelelwe ukuthi ancedise iqembu lakhe elitsha liyefinyelela inkundla sePremier League, njengalokho akwenza kuHighlands Park.
Uthe usaselawo amandla ledlabuzane.
“Ngizabahambisa kuPSL ngesizini ezayo. Idlabuzane ngilalo njalo ngisasekhona emdlalweni,” kutsho unozinti lo.
Kusenjalo iSekhukhune United isibike ukuba izasebenzisa inkundla yeMakhulong Stadium okuyilapho uKapini azakhela udumo esadlala kuHighlands Park.
