uMthunywa
Sikhumbuzo Dabengwa
Uyabazi na ubuntombi? Uyabazi na ubujaha? Bugcinwa ngubani bona ubuntombi? Bona ubujaha bugcinwa ngubani?
Nanzi izintombi lamajaha ziphathekile ngemihloliso yazo. Asibuhle bazo nxa kunje ngoba loba yiliphi ifutha nxa lithe lagcotshwa kuhle, konke kuyavuma. Ngitsho ngoba zibonakala seziyimdudla nje, izihlathi ngomatuklelana.
Ngapha amajaha lawo, ijaha sekulijaha elimajaha mabili. Asibonge ngoba akukabi lasici kulelibanga, sisafunda sonke. Kuhle bangane ukuba sibambe siqinise ezifundweni ngoba imfundo iyiyo esipha ikusasa lethu.
Education
Ibanga lokuthomba lingumadida. Lona alikhathazi kulabo abaqakathekisa izifundo zabo kanye lalabo abalandela imilayo yabogogo labobabamkhulu abayitshelwa ngasemaxhibeni becambalele bakwethu.
Imilayo le yiyo ekhokhelela ekuzigcineni lasekuqakathekiseni ukuphatha kuhle imizimba yethu elithempeli lethu. Yebo kambe bakhona abangathi abalabo ogogo labobabamkhulu kodwa akuswelakali omalume kumbe obabakazi. Lababantu asibasondeleleni bafundi ngoba amakhono okuziphatha, okuzikhuza, okuzithiba lokuzazi balawo.
Yibo lababantu abasebenza umsebenzi wokuba babone ukuba kuphuma umuntu olomthetho lobuntu ekhaya.
Asimangali nxa bekhona abangabe sebehambe bajaha umdaka! Laba yibo labaya osimbece abathi ngokuhlangana lebanga leli lokuthomba, abasuka badideke kalula bacabange ukuba njengoba sebebhalile imihloliso sebekhangelelane lempilo ka “Sengikhulile mama lobaba”.
Yebo kambe siphakathi kwaso leso sigaba sokukhula kodwa phela lesisigaba nxa omunye lomunye engasihlolisisanga, singamthatha simbeke le komhlambi kazelusile. Kungaphi komhlambi kazelusile.
Imfundo
Kukomachanca, kompunzi idla emini, okungalandelwa mthetho khona. Siyakhuza bafundi ukuba kubi lokhu. Usasekhona umango ngoba indaba yokuzigcina imayelana lokuzibekela umphako wakho wasekwendeni kumbe ekuthatheni. Kusizani ukuyadinga ukutheza inkuni, kuthi ekuthezeni kwakho uze usisitheka lokhuni olukhulu kodwa ludliwe ngumuhlwa phakathi.
Uthi ululahla phansi ekhaya luvele luthi phaha lubhidlike ingaphakathi ivele ukuba aluselukhuni lwalutho, lubolile ngomuhlwa, ungeke usapheka. Kuhle-ke bafundi ukuzigcina, sigcine imizimba yethu ukuze ingahlaselwa yizibungu lezinsikizi ezilumayo.
Ngiyaphinda. Umuntu lomuntu kaziphathe. Azikhuze. Azithibe. Angalandeli amadlabuzane okukhula wona adunga abhidlize ubuntu bomuntu. Simbona njani umuntu osesehlulwa yikuziphatha bafundi.Simbona ngokungalandeli imithetho yangekhaya, eyesikolo, eyezinkonzweni kanye leyasemphakathini imbala.
Usezenzela umathanda, kumvunulo, ekukhulumeni lasekwenzeni. Akaselamthetho ngoba eselandela imithetho yabangane lalaba aseyengane labo. Asinanzeleleni bakwethu. Iyobonana kwelizayo.
