uMthunywa
YiNtatheli kaMthunywa
ZISELE zithithibele izakhamizi zeHwange ngemva kokuba omunye umfana ebulewe yingwenya.
UKhansila kaWadi 18 uLowani Shoko, uthe isehlakalo lesi senzakale edamu elibizwa ngokuthi Deka ngoMvulo emini ngesikhathi umuyi obeleminyaka yokuzalwa engu-19 eluse inkomo zomqhatshi wakhe.
“Sizwe ngesehlakalo lesi ngezikhathi zemini izolo njalo lokhu engikuzwileyo yikuthi umfana lo ubelusile endaweni zedamu leDeka ehamba lomunye umngane wakhe,” kutsho uShoko.
“Ngenxa yokuthi belitshisa likhipha inhlanzi emanzini, umfana lo kubikwa unakane ukungena emanzini ageze yikho lapho ahlaselwe yingwenya yamhudulela emanzini.
“Umngane wakhe ugijime wayabikela izakhamizi kodwa ngesikhathi zifika lapho okwenzakale khona ingozi umfana ubesenyamalele.
“Izakhamizi zimdingile okwamahola amahlanu zasezibona indawo emanzini ebisibomvu gebhu ngenxa yegazi.
“Ingwenya le kubikwa ibikhona lapho ilokhu imbambile izakhamizi zadonsa umzimba wakhe zawuxakulula emlonyeni wayo kodwa ubesedlule emhlabeni.
UShoko uphethe ngokuthi umfana lo uzabekwa kuyonale iviki. —Ubulembu
