Uncategorized

Ubulewe okutshwaqisa umzimba umfana (7)

01 Oct, 2020 - 03:10 0 Views
Ubulewe okutshwaqisa umzimba umfana (7) Osolwa ngokubulala uTafadzwa Shamba (40) utshengisa indlela abulala ngayo umfana oleminyaka eyisikhombisa uTapiwa Makore ngesikhathi kuchwayisiswa esigabeni seMakore ngaphansi kwenduna uMangwende eMurehwa

uMthunywa

YiNtatheli kaMthunywa
UMALUSI uTafadzwa Shamba osanda kubotshwa esetheswa icala lokubulala uTapiwa Makore (7) esiqintini seMakore koMurehwa ngoLwesibili utshele abaphenyi ukuthi waquma ikhanda lomfanyana ngengqamu phakathi kwamabili, uyise omdala emkhanyisele ngesibane.

Umetheswacala uchaze lokhu ngesikhathi ehanjiswe ngabaphenyi lapho okwenzakala khona icala leli.

UShamba uthe ngemva kokumbulala, wathwala iphepha elimnyama elalilekhanda kanye lesidumbu esasiqunywa-qunyiwe kukanti umqhatshi wakhe, onguyise omdala kamuyi, uTapiwa Makore (Omdala), wathwala laye elinye iphepha elalilezandla kanye lenyawo.

UMakore laye usesezandleni zabomthetho njalo umiswe emthethwandaba ngoLwesibili esetheswa icala lokubulala.

Egqoke impahla zejele, uShamba obekhanya engahlalisekanga, ukhokhele amapholisa waya lapho athumba khona umfana ngemva kokulaywa nguyise omdala.

Esuka lapho uqonde lamapholisa emzini kayisemdala lapho athi wamnika ukudla andubana amdakise ngotshwala obubizwa ngokuthi yi-kachasu wasemvalela endlini okwamahola ambalwa.

“Ngangena emkulwini ngaphathela umfanyana isitshwala kanye lenhlanzi ezomileyo. Ngamgezisa izandla ngingakamniki ukudla. Esedlile, ngaya emzini kaNkosikazi Katsande ngayathenga i-5 litres yotshwala be-kachasu.

“Nganatha utshwala ukuze ngibe lesibindi. Ngafaka itshukela mbijana nganika umfanyana owabunatha waze wadakwa walala.

Ngasengimvalela endlini andubana ngibuyele kuNkkz Katsande ukuyathenga obunye utshwala,” kutsho yena.

Ngesikhathi ekoKatsande abalindi bendawo baveza ukuthi kulomntwana ongabonakaliyo. UMakore (Omdala) wahamba loyise womfana uMnumzana Munyaradzi Makore ukuyadinga umfana kodwa phakathi kobusuku bama.

UShamba uthe wahlangana loyise omdala womfana phakathi kobusuku baya entabeni laye lapho abafika bambulala khona.

“Phakathi kwamabili savula umnyango sathwala umfana owayelokhu elele saya laye entabeni zesigabeni. “UMnu Makore wayethwele ingqamu kanye lamaphepha epulastiki. Sesisentabeni ngabandezela umfana phansi ngaquma ikhanda lakhe ngengqamu ebukhali, uyisemdala engikhanyisele.

“Ngaphinda njalo ngaquma izandla kanye lenyawo, safaka izitho lezi emaphepheni ehlukeneyo. Mina ngathwala elilekhanda kanye lomzimba kukanti uMnu Makore wathwala elalilezandla lenyawo,” kutsho yena.

Kuleyondawo abaphenyi bananzelele ukuthi bekulengcekeza yangaphandle okungaba ngeyomfana ayikhuphayo ngesikhathi ebulawa.
UShamba utshele abaphenyi ukuthi wahlanza indawo leyo watshisa utshani ukuze kungabi lobufakazi.

Uthe ngesikhathi sebebuyela emzini kaMakore umthwalo wawususiba nzima kakhulu wasetshiya isidumbu duzane lomuzi kaMnumzana Summer Murwira.

“Isikhwama sasesisinda njalo izinja zasezikhonkotha. Kwasokumele ngiphosele phansi umzimba ngihambe lekhanda,” kutsho yena.

Sengisemzini kaMakore, ngalaywa ukuthi ngifake ikhanda kwelinye ikamelo, ngakwenza lokho.

Ngosuku olulandelayo, uShamba uthe waphosela izandla lenyawo engcwabeni eliseduzane njengoba uphenyo lwamapholisa lwaseluqina ngamandla. Amapholisa asadinga indoda yesithathu eyinyanga eyiyo eyanikwa ikhanda.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds