KULENINA leKezi eMatobo esabelweni seMatabeleland South elihlala kweleSouth Africa elibotshwe ngamapholisa lisetheswa icala lokubulala umntwana womkalo ongumfana oleminyaka yokuzalwa emihlanu andubana limqumaqume izitho zibe zincezu.
Isikhulumi samapholisa kweleSouth Africa uColenel Dimakatso Selling ugcizelele indaba le.
Kubikwa uSenzeni Desire Ndebele wabulala umntwana wasequma umzimba waba zincezu njengendlela yokuphindisela umkakhe ngesizatho esingazakaliyo.
Kubikwa ngemvabkokwenza lokhu wathatha umzimba wasewufaka esakeni.
Akukazakali ukuthi umntwana lo wabulawa nini kodwa uNdebele kubikwa wathi esenze njalo wapakitsha izikhwama zakhe ngoLwesine olwedluleyo wasebaleka labantwabakhe ababili.
Umzimba womntwana lo wabonakala ngoLwesihlanu oludlulileyo endaweni yeTurddontein eJohannesburg lapho okwakuhlala khona uNdebele.
UmkaNdebele onguyise womntwana obuleweyo uNewton Mntinsi uthe kasazi isizatho esibangele ukuthi umntanakhe abulawe.
“Ngiyesaba ngengikwenzelwe ngunkosikazi wami, asizange sihluphane kusukela sihlala sonke okungenza ngicabange ukuba aze aphindisele ngokubulala umntanami. Konke kwakulungile phakathi kwethu,” kuchaza uMntinsi.
Kunjalo uNdebele wazama ukubaleka kodwa akasaphumelelanga wabotshwa ngamapholisa esegalajini leSasol Garage eJohannesburg esesiya eCape Town.
UMntinsi uthi balinde ukuba umzimba womntwana uhlolwe ngodokotela ukuze kwazakale ukuba wabulawa nini.- Ubulembu