uMthunywa
Ethel Ncube
ZISADIDEKILE izakhamizi zeKamativi ngesenzo senye indoda ehlahlele unina ngehloka wafa imethesa icala “lokucatshisa isitho sayo” sangasese.
UMtshumayeli Tshuma oleminyaka engu-34 yokuzalwa wenze imbedumehlwana le ngoLwesibili emini kuyonale iviki.
Kuvele ukuba uTshuma wavakatshela inyanga elohlupho lokwehluleka ukuhlangana lesithandwa sakhe, watshelwa ukuba lokhu kungenxa kanina.
Kubikwa uTshuma walanda unina uJosephine Nyoni wafika wamhlasela emethesa icala lokunyamalalisa isitho sakhe andubana amsukele amhlahlele ngehloka, ambulale.
Ekhuluma loMthunywa omunye wezakhamizi zakule indawo uMnumzana Elias Shumba uveze ukuba abalankani ngesiga lesi.
ihloka
“Silokudana ngokulahlekelwa ngumama esigabeni ebulawa ngumntanakhe, kubangwa indaba obekungakhulunyiswana ngayo.
“UTshuma ulande unina wathi nguye owenza ehluleke ukuhlangana lentombi yakhe ngoba isitho sakhe usidinga asiswele.
“Wadobha ihloka wamhlahlela ngalo wahle wathi daca phansi kazange aphinde avuke. UTshuma wazama ukubaleka kodwa sihle sambamba njengezakhamizi wasitshela lokuthi unina umbulalele ukuthi nguye obebangela ukuthi abekusimo akiso,” kulandisa uMnu Shumba.
Intatheli ixhumane lesikhulumi samapholisa eMatabeleland North uInspector Glory Banda oveze ukuba indaba enjalo bayitholile.
uInspector Glory Banda, Matabeleland North
“Sibophe umetheswacala uMtshumayeli Tshuma oleminyaka engu-34 obulele unina ethi wenza isitho sakhe sangasese sinyamalale.
“Sibonga uzulu ngokusincedisa ukubopha umetheswacala ngoba ubesebaleka.
“Sixwayisa uzulu ukuba angaba lohlupho abikele abamfundisi loba abantu abadala hatshi ukusebenzisa udlame,” kuphetha uInsp Banda.
