uMthunywa
Leonard Ncube
KULENDODA yeLupane esigwetshwelwe ukuhlala entolongweni okweminyaka emine ngemva kokubulala umngane wayo kubangwa ukuthi ngubani omdala phakathi kwabo.
ULevison Luphahla oleminyaka engu-31 yokuzalwa njalo ehlala eGeleza eJotsholo ngaphansi kwenduna uMabhikwa, lomuyi uKhumbulani Tshuma bazalwa ngomnyaka ka1990 njalo baba ngabangane.
Ubungane babo buye baphela ngesikhathi bebangisana ukuthi ngubani omdala phakathi kwabo ngesikhathi beselimeni lokuvuna amabele emzini kaNkosikazi Mainah Ncube.
Kubikwa ngemva kokuvuna uLuphahla lomuyi bazitika ngesigodokhaya esasiphekelwe bonke ababeselimeni lapho okwasuka kwavuka khona umsindo.
Umuyi kubikwa wadobha izitulo ezimbili watshaya uLuphahla andubana abaleke.
ULuphahla kubikwa wahle wamhlala izithende wambamba phakathi kwensimu lapho ambonda khona ngesigodo wamtshiya ethe daca.
ULuphahla umiswe phambi kukaMahluleli uJustice Martin Makonese eHwange lapho atholakale elecala lokubulala engajonganga.
Ugwetshelwe ukuya ejele okweminyaka emine ngaphambi kokuba esulelwe owodwa okweminyaka emihlanu nxa engaziphatha kuhle.
Umtshutshisi uNkosikazi Martha Cheda uthe lokhu kwenzakale ngenyanga kaNkwenkwezi nyakenye.
“Mhlaka 31 Nkwenkwezi kumnyaka ophelileyo ngo 8:30 ntambama, uLuphahla lomuyi babenatha isigodokhaya elimeni koMainah Ncube.
“Bathe besanatha baqala ukuphikisana bebanga ukuthi ngubani omdala,” kulandisa umtshutshisi.
Umuyi kubikwa wadobha izitulo ezimbili watshaya uLuphahla ekhanda wasuka wabaleka.
ULuphahla wamxotshanisa wambamba watshaya ngesigodo.
Isidumbu sikaTshuma satholakala ekuseni phakathi kwensimu kwaba yikubotshwa kukaLuphahla.
Igqwetha likaLuphahla bekunguNkosazana Linda Mthombeni.
