uMthunywa
Thokozile Mbedzi
ZIlOKHU zinkemile izakhamizi zesigabeni seChabeta eBeitbridge ngemva kokuba enye indoda itshone inathisa enye, engumakhelwane wayo utshwala, ebusuku yaya bulala umkayo.
Imbedumehlwana le yenzakale mhlaka 2 kuyonale inyanga.
Umetheswacala uTulu Juta Mukoni Magwani oleminyaka engu-65 ubulele uSaliphia Ndou oleminyaka engu-52, kulandela ukumgamula ngebhemba elele lomkakhe, uDambudzo Moyo.
Kubikwa ngesikhathi uJuta ehlasela uNdou umkakhe wayengezwa lutho nanko phela wayetshone enathiswa utshwala nguJuta.
UMthunywa uzwe ukuthi uJuta ebona ukuthi usebulele uNdou wasuka lapho wayazixhonxa ngengqamu.
Ekhuluma lentatheli kaMthunywa uSobhuku wakulindawo uMnumzana Ayipfeli Mudau uthe balesithuli ngenkemenkeme ebehlele esigabeni sabo.
“Silesithuli silapha ngesiga esisehleleyo esigabeni sethu, uJuta Mukoni watshona edakisa uDambudzo kanti wayevele esazi ukuthi ulenjongo yakhe yokuba ebusuku abantu sebelele uzakwenza inkalakatha yendaba esitshiye sonke nje simadolonzima.
“UJuta ngumfowethu, njalo kukhanya waba lokungazwisisani loNkosazana Ndou kodwa akula esizaba kwazi ngoba sefile ukuba azikhulumele. UDambudzo uthi yena wezwa umkakhe esithi wafa kodwa ukuthi lowomuntu owayembulala wayengene njani kazange akuzwe ngitsho,” kulandisa usobhuku uMudau.
Uqhubekele phambili esithi uJuta wathi esuka lapho wazinxoxha njalo wazama lokuziquma quma efuna ukuzibulala kodwa abatsha bamfica esaphila.
Isikhulumi samapholisa esabelweni seMatabeleland South ulnspector Philisani Ndebele ebuzwa ngodaba lolu uvumile wathi solufile ewofisini yakhe.
“Sixwayisa uzulu ukuba azame ukuthi nxa kulokungazwani bakhumisane umlotha hatshi ukuthi kucine kusiba lokulahleka komphefumulo. Sithi phansi ngodlame ngoba kalulungisi lutho,” kuphetha uInsp Ndebele.
