uMthunywa
Blessing Moyo
KUDABA olutshiye izakhamizi zeMvuma zithwele imikhono emakhanda, kulenina elibelethe amaphahla qede lawabulala andubana liwafake phakathi kwephepha liphose ebhimu, uMthunywa ukuzwile lokhu.
UNyarai Swatch ohlala elokitshini leMashayavhudzi, eMvuma kubikwa wenze insindabaphenduli le, mhlaka 23 Mbimbitho ngezikhathi zekuseni endlini yakhe.
Umetheswacala wabeletha amawele lawa angabafana eyedwa endlini andubana awabulale. Ngemva kwalokho wababophela epulastikini wabaphosela ebhimu.
Kubikwa indaba le yabikwa emapholiseni ngowayezidlulela ethola abantu bebuthene bebona isimanga lesi ebhimu.
Isikhulumi samapholisa uInspector Emmanuel Mahoko uthe udaba lolu selufikile ehofisini yakhe.
uInspector Emanuel Mahoko
“Amapholisa achwayisisa ngokufa lokulahlwa kwamawele abesanda kubelethwa ngunina. Kucatshangelwa ukuba uSwatch wabeletha empondozankomo eyedwa wabulala amawele angabafana.
“Ngemva kwalokho wawafaka epulastikini wawaphosela ebhimu,” kulandisa uInsp Mahoko.
Kubikwa izidumbu zathathwa zayahlolwa esibhedlela kukanti umetheswacala lokhe esesibhedlela seMvuma.
Isikhulumi samapholisa siphethe ngokuxwayisa uzulu ukuthi kumele bahlele izimuli zabo.
“Abantu kumele baqale bahlele izimuli zabo ukuze bangabi labantwana abangabafuniyo. Lokhu kuzaphathisa ukuthi babakhulise ngendlela eqondileyo.
“Abantwana bayisibusiso esivela kuNkulunkulu ngakho abazali kumele bakhuthokozele ukubakhulisa. Ukubulala licala njalo kuyisono,” kuphetha uInsp Mahoko.
