Uncategorized

Ubulala akhuphe uyise amathumbu awalengise esihlahleni

23 Nov, 2023 - 00:11 0 Views
Ubulala akhuphe uyise amathumbu awalengise esihlahleni

uMthunywa

Langelihle Moyo

ZISATSHAQEKILE izakhamizi zesigabeni se-Kufazvinei eGokwe North ngaphansi kwenduna uChireya, ngemva kokuba enye indoda ibulele uyise yamkhupha amathumbu yawalengisa esihlahleni imgcona ngobuthakathi.

Umetheswacala uTinevimbo Nyika oleminyaka engu-23 kuthiwa wayengakibo ekuseni waqala ukusola uyise, uAison Nyika oleminyaka engu-69 ngokubangela ingxabano emulini ngobuthakathi. Kubikwa uyise wathukuthela ngenkulumo yendodana yakhe le wadobha insimbi wayitshaya ngayo enyaweni lwenxele.

Ngemva kwalokho umetheswacala wahluthunela uyise insimbi, wamtshaya ngayo waze wafa sengathi kwakungenelanga wabuye wamdabula isisu ngenqamu wamkhipha amathumbu wawagaxa esihlahleni duze lalapho ambulalele khona egumeni wabaleka. 

Intatheli kaMthunywa izwe ukuthi kusenzakala lokhu umfowabo kametheswacala oleminyaka yokuzalwa engu-13 wayekhangele. 

uInspector Emmanuel Mahoko

Kubikwa umfanyana lo waphanga wayabikela udadewabo owayesesivandeni bucwadlana lekhaya ngalokho okwasokwenzakele bayabikela amapholisa ngodaba lolu.

Isikhulumi samapholisa eNkabazwe uInspector Emmanuel Mahoko uthe amapholisa eNembudziya asebophe umetheswacala njalo athole lensimbi ayisebenzisa ukutshaya uyise.

“Amapholisa asaqhubeka ngokuchwayisisa ukuze kutholakale ubufakazi obugcweleyo umetheswacala ahanjiswe emthethwandaba,” kulandisa uInsp Mahoko

Ukhuthaze uzulu ukuthi nxa belenkinga ezimulini kumele bazise abakhokheli bezigaba babancedise.

“Ongaba lolunye ulwazi ngokwenzakeleyo ngodaba lolu kazise amapholisa. Ngithanda ukukhuthaza uzulu ukuthi nxa kukhona okubahluphayo ezimulini bazise inkokheli zabo zezigaba zibancedise ukuxazulula okuyabe kubahlupha,” kuphetha uInsp Mahoko.

Share This:

Sponsored Links