uMthunywa
YiNtatheli kaMthunywa
UKUGCWALA kwenkundla yeBarbourfields mhla iHighlanders ithwala inkezo yeChibuku Super, kwatshengisela ukuthi kungela abalandeli, leliqembu angeke liyendawo.
Inkonkheli zeqembu ziyavuma ukuthi azikaze zibone usekelo olunjalo kuminyaka eyedlula itshumi. Inengi labasekeli elalihlose ukubukela lumdlalo lehluleka ukungena ngoba sekuyinhlabathi eMagumeni kusiyatshaya ihola lesibili emini.
IHighlanders yadlula phezulu kweNgezi Platinum ngebhola elilodwa eqandeni.
Umgcinisihlalo weBosso uKenneth Mhlophe ubikele iphephandaba likazulu ukuba abalandeli yibo abenza iqembu lanqoba.
“Abadlali benza kuhle ngenxa yokuthola idlabuzane elivela kubasekeli abeze ngobunengi babo. Sekuyisikhathi eside singakaze sibone ukugcwala kweBF ngaleyondlela. Sibonga abalandeli, ngesikhathi iqembu lingenzi kuhle isizini iqalisa, bahambe lathi. Kuyabonakala ukuthi ubuhle beHighlanders ngabalandeli bayo,” kutsho uMhlophe ngoLwesithathu.
Umgcinisihlalo lo uthe babonga njalo lenkampani ye-NetOne eyiyo ebasekela ngemali.
“Aluba singaphi lungekho usekelo lweNetOne? Siyitshayela ihlombe linkampani. Silethemba ukuthi usekelo lwemali luzakuba khona sisiya phambili.”
Ukaputeni wethimu uAriel Sibanda uthe ukunqoba kunkezo yeChibuku Super kube yiKhisimusi eze masinyane.
“Le yiKhisimusi sibili esiyinikezwe njengabadlali. Sithe inkezo le ayisiyo yethu kodwa ngeyabalandeli. Siyisebenzele inkezo silomqeqetshi esimthanda kakhulu.
Umqeqetshi uHendrik Pieter de Jongh ubikele intatheli kuliviki ukuba ubungalula umdlalo.
“Sihlohle ngesikhathi esifaneleyo labalandeli sebelinde ukuthi basukume. Angikaze ngikubone lokhu, ubuhle obungaka. Ngithabe kakhulu.”
Umqeqetshi lo osebizwa ngokuthi nguHlabangana kazange akhohlwe ukubonga abadlali.
“Isibongo esikhulu siyakubalandeli bethu. Ngicela usekelo lolu luqhubekele phambili. Ngibonga futhi lenhlanganiso zePSL leChibuku ngokuqoqa inkezo kakuhle,” kutsho uHlabangana.
