uMthunywa
NguEthel Ncube
AKUBIZWA ozwayo ngempelaviki lapho okuzabe kulomcimbi wokukhetha amantombazana ageze kuhle lagqoke kuhle eCaravan Park eMzansi Afrika.
UMahlekisa uPromise Sibanda owazakala ngokuthi nguDj Mapressa uzabe elomcimbi omkhulu wokuzama ukugqugquzela ukugeza, ukugqoka kuhle lokuhlanzeka kumantombazana aseZimbabwe ahlala eMzansi Afrika.
UMthunywa uxhumane loMapressa onguye umnikazi womcimbi waveza ukuba wonke amalungiselelo asesezingeni eliphezulu.
“Umcimbi lo ubizwa ngokuthi yiMapressa Glamour and Fashion Show wenzakala okwesithathu. Sizama ukuba siqakathekise ukuhlanzeka lokugqoka kuhle. Amalungiselelo wonke asesezingeni eliphezulu sesilinde ukuba usuku lufike abalandeli baze ngobunengi babo bazojabula kanye lathi.
Kumcimbi lo kuzabe kulabantu abehlukeneyo abavela endaweni ezitshiyeneyo bemele izindawo abasuka kuzo ekhaya,” kubika uMapressa.
DJ Mapressa
Uqhubekele phambili eveza ukuba untombazana ozakhethwa ukuba ugeze kahle wagqoka kahle uzathola imivuzo.
“Untombazana ozabuya egeze kuhle wagqoka kuhle uzathola imivuzo eyisithupha ebalisa: itikiti lokuphapha ngendizamtshina esuka eJoburg esiya eDurban esiyakudla ukudla kwemini aphinde aphenduke, aphinde athole imassage mahala, okwesithathu uzahamba ayefunda izifundo ze-beauty therapy ekolitshini okuthiwa yiThembalethu Academy sekubhadelwe okwesithathu uzathola iheadboard okwesihlanu uzalungisiswa inwele mahala okwesithupha uzathungelwa isigqoko asifunayo esidulayo okwamagama.
“Imvuzo le izaphiwa umuntu oyedwa ogezileyo wabamuhle wagqoka kuhle njalo uzakubizwa ngokuthi nguMiss Mapressa July Glamour and Fashion Show 2023. Kuthi abazame bebahle bemele iKezi, Plumtree, Bulawayo, Filabusi, Binga, Lupane, Hwange, Tsholotsho leNkayi bazathola imivuzo labo. Umcimbi uzagoqwa ngokwethulwa kwe DVD yami ethi Igeja likaMaNgintsho wona owethula izinto ezimbi ezenziwa yintsha yakithi ebusuku eHillbrow lokhu kuyindlela yokuzama ukuba betshiyane lokuganga,” kuphetha uMapressa.
