
Langelihle Moyo
KULENDODA yeFilabusi esezandleni zamapholisa ebotshelwe icala lokudlwengula inkazana eleminyaka engu 15 yokuzalwa.
Umsolwa esingasoze simqambe ngenhloso yokuvikela umamangala, uleminyaka engu-27 yokuzalwa njalo ngowe siqintini seNyamimbe eFilabusi, esabelweni seMatabeleland South. Umsolwa kuvele ukuba usebenzela eBellevue, edolobheni lakoBulawayo.
Kubikwa laba ababili bebethandana.
Umntwana lo, kubikwa njalo ukuba wanyamalala okwensuku ezine esejaheni lakhe leli, okwenza abazali bakhe bagijima bayabikela amapholisa.
Umetheswacala kuvezwe ukuthi mhlaka 22 Nhlolanja kuwonalo umnyaka ngehola lesikhombisa ebusuku, wahamba lomamangala endlini yakhe. Bathe sebefikile kubikwa umsolwa waphoqha umamangala ukuthi alale akhangele phezulu wasemkhipha impahla zonke ayezigqokile ezigoqela isiketi, isikipa kanye lesigqoko sangaphansi, waseqala ukumqabula ngemva kwalokho wamdlwengula engela jazi lomkhwenyana.
Kuthe mhlaka 24 kuNhlolanja, umntwana wabikela uyisekazi ngalokhu okwakumehlele, wahle wahanjiswa esibhesidlela okuyikho okwavela bonke ubufakazi bokuthi udlwenguliwe. Umsolwa wabotshwa mhlaka 27 Nhlolanja. 2023.
Indaba le isisemthethwandaba. Umetheswacala useke wathonisiswa ngumantshi uDambudzo Malaba kwathiwa abhadale imali yebheyili.
Ukuthethwa kwecala kuzaqhubeka mhlaka 30 Ncwabakazi 2023.