uMthunywa
Ethel Ncube
IZAKHAMIZI zeDolo eMberengwa zizonde zigane unwabu ngesenzo selinye inina okubikwa ukuthi ngenhloso yokuphendukisa umkalo obeseleminyaka eyisikhombisa behlukana lithethe igemesi lamaPositoli lendoda, ibhavu kanye lendiwo layakubophela entabeni ezilayo.
Inina leli, uNkosazana Concilia Tshuma kumaviki amabili edluleyo kubikwa uvakatshele umphurofethi onguye omlaye ukuthi ayebophela impahla zendoda ukuze iphenduke ekhaya nanko ibisidliwe zindunduma zeGoli.
Okuthukuthelise izakhamizi yikuthi intaba lapho uNkszn Tshuma abophele khona impahla zomkakhe iyazila okwenza ingagadwa.
Esinye isakhamuzi esagada intaba kusiya kwethulwa impahla uNkosazana Meliwe Sibanda uveze ukuba balesimanga ngesenzo sikaTshuma sokuphendukisa indoda okukade behlukana.
“Lobu yibuthakathi, abukho obudlula lapha. Kambe umuntu ayebophela igemesi phezu kwentaba ezilayo. Intaba le ayigadwa nguye wonke umuntu nje ngoba kwesinye isikhathi uyayizwa iduma yodwa.
“UMaTshuma uthi yena igemesi leli waliphiwa ngumphurofethi njalo wamlaya ukuthi alekele entabeni okwensuku ezintathu ukuze umkakhe aphenduke.
“Ngesikhathi igemesi leyo ibonakala insuku ezintathu zazingakeneli kodwa kwahle kwakhethwa abantu ukuthi bayeyethula phezulu lanxa wazama ukuncenga ukuthi kulindwe insuku ezintathu,” kuchasisa uNkszn Sibanda.
Uqhubekele phambili echaza ukuba uNkszn Tshuma wayekukholwa ukuthi ukubophela impahla zomkakhe entabeni kuzenza iphenduke.
“Wathi umphurofethi wamtshela ukuthi ngemva kwamalanga amathathu umkakhe uzabe esephendukile eGoli,” kuchaza uNkszn Sibanda.
Imizamo yokuxhumana loNkosazana Tshuma onguye owafaka igemesi entabeni yehlule ngoba ucingo lwakhe belungangeni kwaze kwafika isikhathi sokudindwa kwephephandaba.
