uMthunywa
YiNtahtheili kaMthunywa
INTUKUTHELO ebangelwe yikuncitshwa uluju lwemvelo yenze enye indoda yeNyirenyire eGokwe yehluleka ukuzithiba nanko phela icine isitshaya uninazala ngoba umkayo esebaleke wayacatsha ngakibo.
Indoda le okutholakale ukuthi nguChoga nje kuphela eleminyaka yokuzalwa engu-45 ehlala ngaphansi kwenduna uChiya Chireya ixabane lomkayo uPrecedence Shoko oleminyaka engaba ngu-25 okubangele ukuthi ize incitshwe ucansi okuyikho okubangele ukuthi imgijimise aze ayecatsha ngakibo lapho ecine itshaya khona uninazala.
Kubikwa ngalelolanga uChoga waxabana lomkakhe okuyikho okwenza wathi sesekamelweni baqhubeke ngokungazwani lokhu wacina encitshwa uluju lwemvelo.
Kubikwa uNkosikazi kaChoga ebona ukuba umkakhe kakwamukeli ukuncitshwa lokhu wacela ezinyaweni elubhekise ngakibo lapho afika wacatsha ngemva kukanina.
Induna yeGokwe uChireya ibikele uMthunywa ukuthi umkhwenyana lo kazange aphozise amaseko walandela ngesiqubu lapho afika wazama ukudonsa umkakhe ukuze babuyele emzini wabo uninazala wezwakala ekhwaza ethi ngeke aphinde aluthole uluju lwemvelo kumntanakhe.
“Abadala kumele bazi ukuthi nxa abantu bethethene bangalwa baxolelana ngesikhathi behlangana emacansini ngoba ucansi luyisiqokoqela semizi yonke.
“Owesifazane owendileyo kalandi ukuyakudla nje isitshwala kwabozala kodwa kumele ayegcina umuzi wakhe. Kule indaba umamazala wabalephutha ngendlela akhulumisana ngayo lomkhwenyana wakhe ngoba kwakumele athole ezinye indlela zokuxazulula udaba lolu ngoba yena indaba zomuzi wendodakazi yakhe akumelanga azingene.
Ngakolunye uhlangothi umkhwenyana laye kazange aziphathe ngendlela efaneleyo ngoba kuyazila ukuthi abeke uninazala isandla,” nguChireya lowu.
Induna uChireya ibuye yaxwayisa abathetheneyo ukuthi akuqondanga ukuthi kubelodlakela emakhaya.
“Njengoba siphakathi kokunanza lokulimukisa uzulu ngobubi bodlakela emakhaya i-16 Days of Activism Against Gender-Based Violence ngithanda ukuthi ngitsho la amazwi: “Udlame lokuhlukuluzana emakhaya yinto embi kakhulu okungamelanga yenzakale. Ngithanda ukutshela abesilisa ukuthi abesifazana yizitsha ezibuthakathaka kungakho kumele ziphathwe ngonanzelelo ukuze zingalimali.
“Ngakolunye uhlangothi bakhona njalo abesilisa abahlukuluzwayo emakhaya ngendlela esingeke sayitsho ngaphansi kwelanga. Siyahlukuluzwa njengabesilisa sithule ngoba akula lapho ongaqonda khona ngokwesaba abantu ukuthi bazathini usuhamba usithi umkakho ukuhlukuluzile.
“Ngithanda ukuxwayisa obaba ukuthi lanxa behlukuluzwa bangacini besebenzisa amandla abo endalo ngoba lokhu kungabangela ukuthi badliwe ngumthetho,” utsho njalo.
Induna uChireya iphethe ngokuthi ukufela ngaphakathi uhlukuluzwa akuqondanga, kukulimaza emoyeni, engqondweni, emzimbeni kumbe kucine kusiba lesidumbu phansi kukanti lokhu bekungenqatshelwa.
