uMthunywa
YiNtatheli kaMthunywa
UMQONDISI wenkampani yeBhiza Chemicals uSungurai Bhiza usethe uzimisele ngokupheleleyo ukubona ithalenta lezemidlalo emabandleni okholo lisiyaphambili.
UBhiza utsho kanje esanda ukubika ukuthi uzasekela ngemali amaligi enguqu lomdlalo wokuqaga ngaphansi kweChristian League koBulawayo ngeviki edluleyo.
Usomabhizimusi lo wenze umcimbi wokuvula iligi obuqhutshelwe enkundleni yeUnited Teachers’ College.
Ekhuluma loMthunywa kuliviki, uBhiza uthe kasoze adinwe ngokuphathisa ezemidlalo.
“Inhloso yethu ngeyokuncedisa iligi yamabandla le ukuthi ibonakale kwezemidlalo. Sibonga ukuba amaqembu angaphansi kweBulawayo Christian League awenguqu le-netball ababaza ilizwi leNkosi ngokuqhuba ezemidlalo,” kutsho uBhiza.
UMgcinisihlalo weBCL uLawrence Chats, ophinda akhokhele iqembu le-Life Spring Ministries uthe bakhangelele ukuthi imidlalo yabo incintiswe ngamaqembu afika amatshumi amabili lantathu.
“Okwenziwe ngubaba uBhiza kuyamangalisa ngoba ngesikhathi amankampani amanengi ebika ukuthi ayehluleka ukusekela ezemidlalo, iBhiza Chemicals ize ngesivuvu. Sibusisiwe kakhulu.
Kusenjalo, esinye isiphathamandla seBCL, uFungai Mundofa usekhiphe umbiko wokuthi inkundla isivuthiwe, sebelinde nje ukuthi iligi yabo iqale kuphela.
“Inkundla isivuthiwe impela, sikhangelele ukuthi sibelemidlalo ezahlabusa impela kulisizini. Nxa silabasekeli abafana loBhiza, angeke sehluleke,” nguMundofa lo.
Uphethe ngokwazisa uzulu ukuthi iligi le ikhululekile njalo iyawamukela amaqembu amatsha angabe efisa ukuba ngamalunga ale iligi.
“Ngithanda ukwazisa uzulu ukuthi iligi yethu ikhululekile njalo iwamukela ngezandla zombili amaqembu amatsha angabe efuna ukuba zingxenye zeBulawayo Christian League,” kutsho uFungai Mundofa.
Ngesizini edluleyo iqembu leEagle Life Assembly yilo elanqoba kunguqu. Kumdlalo wokuqaga intshantshu kwaba yiCivil Aviation Authority of Zimbabwe (CAAZ).
