uMthunywa
UMTSHAYELI webhasi ebhewuke yedlula lemiphefumulo yabantu abangu-9 ku-Alma Road, eWelkom, eFree State, ukhethe ukuzibulala kulandela lingozi.
Ngokokhulumela umnyango wezeMpilo eFree State uMnumzana Mondli Mvambi, umtshayeli oleminyaka engu-31, uzilengise esihlahleni ngebhanti alisike kusihlalo sebhasi.
“Umtshayeli uzibulele ngemva kokubona umonakalo odalwe yinhlekelele, lokuthi abantu balimale kangakanani. Sicabanga ukuthi ubezisola yena ngabatshonileyo wakhetha ukuzibulala,” kutsho uMvambi kuphephandaba lansuku zonke lesiNgisi iSowetan.
UMvambi uthe waze ngabatshonileyo ngemva kokukhuluma labezimo eziphuthumayo. Kuthiwa usuke enganakiwe endaweni yesehlakalo wayazibulala.
Uveze lokuthi abanye abagadi bese bebazisile abezimo eziphuthumayo ukuthi umtshayeli ubephikisana labantu ngesikhathi kusenzakala ingozi le.
“Abagadi bathe umtshayeli akahambanga ngendlela efaneleyo, besaphikisana ngalokho, utshayise i-pavement ibhasi yabhewuka.
Kubikwa ukuthi ibhasi le ibhewuke ngabo 5 ekuseni, kwatshona abangu-9, kwalimala abangu-45, abangu-11 labo basesimeni esibibi ezibhedlela. Kwabatshonileyo kubalwa izingane ezintathu.
UMvambi uthe libhasi belisuka eThekwini, lizokuma eWelkom bese lidlulela eBloemfontein.
‑ Ubulembu
