uMthunywa
AKUTSHO lutho ukubhaxabula “utitsha” wakhe kumqeqetshi weSuperSport United, uKaitano Tembo, ogcizelela eyokuzehlisa kubadlali bakhe.
ISuperSport ihlule iMamelodi Sundowns nge 3-1 nxa sekuhlanganiswe impumela yezigaba zombili kunkezo yeMTN8. Kusigaba sakuqala, amaqembu la adlale ngokulingana nge 1-1 kwathi ngoLwesithathu ebusuku Amatsatsantsa ePitori awina nge 2-0 ngamabhola ahlohlwe nguTebogo Mokoena loJamie Webber, eLucas Moripe Stadium, e-Atteridgeville.
ISuperSport ibiqala ukwehlula iSundowns emidlalweni engu-17.
UTembo, oqeqetshwe nguPitso Mosimane kuSuperSport eminyakeni edluleyo waphinda wamcathulisa enza izifundo zokuqeqetsha, uthe akulalutho olwehlula umqeqetshi lo.
“Ngiyamhlonipha uPitso. Ungumuntu engimhloniphayo futhi engazana kakhulu laye. Uyalithanda ibhola lomsebenzi wakhe. Kumnandi ukunqoba ikakhulukazi ngoba iSundowns kade izenzela umathanda kithi kuminyaka le edluleyo. Okwethu bekuyikuzama ukuguqula leso simo, ikakhulukazi ngoba lo ubungumdlalo wabomakhelwane lapha ePitoli. Ngijabulile kodwa futhi akutsho lutho kimi (ukuhlula uPitso).
Mhlawumbe eqenjini kuyinto enkulu ngoba ungumqeqetshi osezuze okunengi. Mina le yisizini yami yesibili ngingumqeqetshi. Angikanqobi lutho. Ngakho akutsho lutho kimi,” kutsho uTembo.
Kumdlalo wokucina wenkezo yeMTN8 e-Orlando Stadium mhlaka 5 Mfumfu, iSuperSport izadibana leHighlands Park efike kulesi isigaba okokuqala emva kokwehlula iPolokwane City.
Kuzobe kungokwesithathu Amatsatsantsa efinyelela kumdlalo wokucina weMTN8 iminyaka ilandelana. Ayiphakamisa inkezo ngo-2017, ahlulwa yiCape Town City nyakenye.
“Sijabulile ngokufinyelela kumdlalo wokucina. Okubalulekileyo kithi yikuzithoba ngoba asikayiphakamisi inkezo. Sizadlala leqembu elinzima iHighlands Park,” kutsho uTembo.
